Angut imigassamik tuniniaasimasutut unnerluutigineqartoq: Immiaaqqat 400-t sinnillit arsaarinnissutigineqartut
Angut 54-inik ukiulik Nuummi imigassanik aalakoornartulinnik unioqqutitsilluni tuniniaasutut unnerluutigineqarpoq. Angut biilernerani politiinit tallimanngornermi unnukkut unitsinneqarami, paasineqarpoq biilimini immiaaqqanik 400-t sinnilinnik nassataqartoq.
Biilit Nuummi H. J. Rinksvejimi politiinit tallimanngornikkut unnukkut unitsinneqarmata, biilini immiaaqqat 400-t sinnillit nassaarineqarput. Aquttuusoq, angut 54-inik ukiulik, politiinut nassuiaagaluarpoq nammineq festeriarluni.
Angut unioqqutitsilluni immiaaqqanik tuniniaasutut unnerluutigineqartoq, Kalaallit Nunaata Politiivi tusagassiorfinnut nalunaaruteqarlutik allapput.
Angutimmi nassuiaataa, tassa puussiat 42-t tamarmik immiaaqqanik qulinik imallit, nassarlugit festeriarnerarnera, politiit upperiuminaatsissimavaat.
- Taakkua pasitsaappat angut biilinik ingerlaartoq immiaaqqanik tuniniaassalluni. Immiaaqqammi qulikkaarlugit puussianut poortorneqarsimapput, tunisariaannanngorlugit. Taamaammat angut tigusarineqarpoq unioqqutitsillunilu immiaaqqanik tuniniaasutut unnerluutigineqarluni, politiit allapput.
Viinnit imigassallu kimittunerit angerlarsimaffiani
Angut 54-inik ukiulik tigusarineqareermat politiit aalajangerput angerlarsimaffia misissoriartussallugu. Kalaallit Nunaata Politiivi ilisimatitsipput angutip angerlarsimaffiani viinnit imigassallu kimittunerit arlallit angutip angerlarsimaffiani aamma nassaarineqarsimasut. Taakkuttaaq immiaaqqatuulli puussianut poortoreersimapput.
- Angutip imigassaatai arsaarinnissutigissallugit politiit aalajangerput - tamanna Sermersooq Eqqartuussiviata marlunngornermi akueraa. Angut unioqqutitsilluni imigassanik tuniniaasimasutut eqqartuunneqarluni pisuutinneqarpat, akiligassitsissaaq imigassaataanillu arsaarneqarluni, politiit allapput.
Tuniniaanermi kingunissat
Politikommissær Malik Olesen nassuiaavoq inuinnaat imigassanik tuniniaasarnerat inatsimmik unioqqutitsinerusoq. Imigassallu niuertarfimmiinnaq piffissamilu aalajangersimasumiinnaq pisiarineqartarnera peqquteqartoq:
- Inuit aalakuuleraangata, persuttaanerit amerleriartarput. Imigassartorsimatilluni pinerliinerit amerlanerusarput. Imigassat piffissami killilikkami nioqqutigineqarnerata efterfestit killilersimaartarpaat, taamatullu persuttaaniarnerit aamma ikinnerutissinnaallugit, politikommissær Malik Olesen oqarpoq nangillunilu:
- Inatsilli soqutiginagu unioqqutitsilluni imigassanik tuniniaaniaraanni, tamanna allanut aamma kinguneqartarpoq. Persuttaasoqarneranik inuiaqatigiinnilu toqqissisimannginnerulernermik kinguneqartarpoq, oqarpoq.