Angut Ilulissani ipilluni ajunaarsimasoq
Kalaallit Nunaanni Politiit sapaammi ullu-qeqqata siornatigut nalunaarfigineqarsimapput, Ilulissat umiarsualivianni angut imaani toqungasoq nassaarineqarsimasoq pillugu. Toqusoqarsimaneranut atatillugu pinerluuteqartoqarsimaneranik pasinartoqanngitsoq, politiit ilisimatitsipput.
Angutip 57-inik ukiullip Nuummeersup Ilulissani illoqarfimmiissimanera ajorluinnartumik kinguneqarsimavoq. Angallammi suliffigisamini suleqatinilu arfininngornikkut unnukkut illoqarfimmiissimapput.
Kalaallit Nunaanni Politiit pigaartuisa pisortaata Bruno Brixip Sermitsiaq.AG-mut ilisimatitsissutigaa, angutip suleqataa naapertorlugu angut illoqarfimmiit kisimiilluni angerlarsimavoq.
Poltiit sapaammi nalunaaqutaq 13.58 nalunaarfigineqarsimapput, inuk umiarsuup talittarfiullu akornanni toqunagsoq nassaarineqarsimasoq pillugu.
Angut Nuummi najugaqartuuvoq, ilaqutaasullu ilisimatinneqarsimasut, pigaartut pisortaata oqaluttuaraa.
Politiinit oqaatigineqarpoq, suliffiup avataatigut toqusoqarneranut atatillugu pinerluuteqartoqarsimaneranik pasinartoqanngitsoq, taamaammallu pisimasoq sulinermi ajurtoornertut isigineqanngitsoq.