Angut ikuallatsitsisimasutut arnamillu 80-inik ukiulimmik toqutsisimasutut unnerluutigineqartoq: Pinngitsuunerarpoq
Angut 30-t sinnerlugit ukiulik pingasunngornermi tunngaviusumik inatsit naapertorlugu killisiorneqarpoq, ikuallatsitsisimasutut toqutsisutullu unnerluutigineqarluni. Angut pinngitsuunerarpoq.
Angut 30-t sinnerlugit ukiulik pingasunngornermi Eqqartuussisoqarfik Sermersuumi Nuummi matoqqasumik tunngaviusumik killisiorneqarpoq. Kalaallit Nunaanni Politiit pingasunngornermi unnukkut tusagassiuutinut taama nalunaaruteqarput.
Angut arnamik 80-inik ukiulimmik toqutsisimasutut aamma Nuummi Ceresvejimi blok O-mi inissiami ikuallatsitsisimasutut unnerluutigineqarluni. Angut pinngitsuunerarpoq, kisianni angutip akunnerni 72-ini tigummigallarneqarnissaanik unnerluussisup piumasaqaataat eqqartuussiviup malinniarlugu aalajangerpoq.
Suliap matoqqasumik ingerlanneqarnera pissutigalugu politiit misissuineq pillugu oqaatigisinnaasaat killeqarput, suliamilu aqqit pineqartut isertuunneqartussanngortinneqarput.
Ilisimannittunit suli tusarusuttut
Kalaallit Nunaanni Politiit misissuineq nangippaat.
- Saaffiginnissutit, videoliat aamma pinerluffiusumit nassaat suli misissussavagut. Tamatuma saniatigut Danmarkimit ikiortinik tikittoqalerpoq, taakku pinerluffiusumik misissuillutillu arnaq toqungasoq misissussavaat, suna toqqutigisimaneraa qulaajarniarlugu, politikommissær Julie Senderovitz Bendtsen, suliami misissuinermi aqutsisuusoq taama oqarpoq.
Piffissami matumani politiit allanik paasissutissaateqanngillat, kisianni innuttaasut suliami paasissutissaateqarlutik saaffiginnittut qujaffigaat.
Innuttaasut suliami soqutiginarsinnaasunik paasissutissaateqartut suli politiinut attaveqaqquneqarput.
Politiit oqarasuaat 70 14 48-mut attaveqarfigineqarsinnaapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...