Angut arnarlu toqutsisimasutut tigummigallagassanngortinneqartut
Eqqartuussivimmit aalajangiunneqarpoq arnaq nalunaaquttap akunnerini 72-ini tigummigallarneqassasoq. Angut novembarip tallimaata tungaanut tigummigallarneqassaaq.
Politiit arfininngornermi ullup-qeqqata siornatigut ilisimatitsissutigaat inuit marluk Qaasuitsup Eqqartussivianut sassartinneqassasut, Ilulissat ikuallaaviani inuup timaata ilaanik nassaartoqarnerata kingorna toqutsisimasutut unnerluutigineqassallutik.
Politiit arfininngornermi unnukkut nalunaarutigaat, angut arnarlu eqqartuussivimmut sassartinneqassasut. Angut novembarip tallimaata tungaanut tigummigallagassanngortinneqartoq, arnaq nalunaaquttap akunnerini 72-ini tigummigallagassanngorinneqarpoq.
Politiit sapaammi ilisimatitsissuteqaqqissalutik ilimasaarutigaat. Angutip arnallu unnerluunneqarnerminnut qanoq isumaqarnersut allassimanngilaq.
AAMMA ATUARUK: Tigusarineqarsimasut marluk toqutsisimasutut unnerluutigineqassasut
Politiit tallimanngornermi Ilulissani adressemi ataatsimi inuit pingasut, suliamut uissuumminartumut atatillugu tigusaraat. Ataaseq kingusinnerusukkut iperaavoq, politiit nalilermassut pineqartoq suliamut attuumassuteqangitsoq.
Unnerluutigineqartut marluk illoqarfimmi najugaqartuupput.
Politiit toqungasup kinaanera ilisimalluarpaat, kinaanerali pisortatigoortumik suli saqqummunneqanngilaq. Ilaqutaasut ilisimatinneqarsimapput.