Angut aalakoorluni sakkulersorsimasoq tigusarineqartoq
Angut 51-inik ukiulik marlunngornermi Qaarsuni tigusarineqarsimavoq.
Politiit marlunngornermi nalunaaqutaq 13.39 nalunaarfigineqarput, nunaqarfimmi Qaarsuni, Uummannap kitaani 20 kilometerit missaannik ungasitsigisumiittumi persuttaasoqarsimasoq.
Pinerluuteqarsimasorineqartoq aallaammik sakkulersorsimavoq, politiillu angut imminut allanullu ulorianartorsiortitsisutut nalilersimavaat.
Kalaallit Nunaanni Politiit taamaammat qulimiguulimmik attartoriarlutik politiinik nunaqarfimmukartitsisimapput, politiit tusagassiorfinnut attaveqartartuat Fabian Uth Nielsen Sermitsiaq.AG-mut ilisimatitsivoq.
Qaatusserteriarlugu iperarneqarsimasoq
Politiit Qaarsunut tikikkamik illu pinerluuteqarsimasorisap isersimaffia assersorsimavaat, tamatumalu kingornatigut illu iserfigeriarlugu angut tigusarisimallugu.
Angut 51-inik ukiulik aapparminut persuttaasimasutut unnerluuutigineqartoq matumani pineqarpoq.
Angut qaatusserteriarlugu pingasunngornermi iperangaasimavoq.