Angut 38-nik ukiulik Niaqornani tallimanngormat toqutsisimasutut tigusarineqartoq

Politiit angut tallimanngormat Niaqornani toqutsisoqarsimaneranut atatillugu ulluni 26-ni tigummigallagassanngortinneqarnissaannik nunatta eqqartuussiviata aalajangiinissaa utaqqimaarpaat. Angut pinngitsuunerarsimavoq.

Politiit angut 38-nik ukiulik angummik 57-inik ukiulimmik Niaqornani Uummannap eqqaaniittumi tallimanngormat toqutsisimasutut pasillugu tigummigallarpaat.

Politiit angutip nalunaaquttap akunnerini 72-ini tigummigallarneqarnissaanut akuerineqarsimapput, angullu ulluni 26-ni tigummigallarneqassanersoq imaluunniit iperagaassanersoq pillugu nunatta eqqartuussiviata aalajangiinissaa utaqqimaarpaat.

Angut 38-nik ukiulik pinngitsuunerarsimavoq, illersuisuata piumasarisimavaa angut iperagaassasoq. Politiit angutip ulluni 26-ni tigummigallarneqarnissaa nunatta eqqartuussivianut piumasarisimavaat. Ullumi ataasinngornermi aalajangiisoqassasoq naatsorsuutigineqarpoq.

Angut politiit nunaqarfimmilu fogedip suleqatigiinnerisigut sapaatip-akunnerata naanerani tigusarineqarsimavoq.

Suliamut atatillugu ikiuuttussanik aggersaasoqarsimavoq, pilersaarutillu malillugit Rigspolitiets Nationalt Kriminalteknisk Centerimi pinerluttoqarsimatillugu misissuisartut marluk toqusimasullu timaannik misissuisartoq ataaseq ataasinngornermi tikissapput.

Powered by Labrador CMS