Angut 36-nik ukiulik iperagaasoq

Angut 36-nik ukiulik, Nuummi politiinit ataasinngornermi unnukkut siorasaarisimasutut tigusarineqartoq maanna iperagaaqqippoq. Politiinut siorasaarisimasutut unnerluussutit suli attatiinnarneqarput.

Angut 36-nik ukiulik, politiinik ataasinngornermi siorasaarisimasoq, politiinit ullormi ataatsimi tigummigallarneqareerluni maanna iparagaavoq.

Kalaallit Nunaata Politiivini attaveqatigiinnermik suliaqartup Fabian Uth Nielsen Sermitsiaq.AG-mut taama ilisimatitsivoq.

- Nalilerneqarpoq unnerluutigineqartup tigummigallarneqarnissaa pillugu inatsit tunngaviusoq malillugu killisiuinissamut peqqutissaqartoqanngitsoq. Allatut oqaatigalugu, tigummigallarneqarnissaanut inatsisitigut tunngavissaqanngilagut, Fabian Uth Nielsen nassuiaavoq.

Politiinut siorasaarisimasutut unnerluussut suli atuutsinneqarpoq. Taamaammat eqqartuussisoqarsinnaanera suli pisinnaavoq.

Aqquserngit assersorneqartut

Politiit aqquserngit Paarnaniit ataasinngornermi 10. januar ualikkut assersussallugit aalajangerput, politiillu arlallit sumiiffimmiillutik. Tamanna sioqqullugu angut siorasaarisoq oqarasuaatikkut oqaloqatigalugu eqqissisarniarsimagaluarpaat.

Politiinit nalilerneqarpoq pisoq ulorianarluinnalersinnaasoq, najugaqarfimmilu najugaqartut pisumi aneqqunagit politiit kaammattuipput.

Politiit gas atorlugu ineqarfimmut iserterlutik angut tigusarisinnaasimavaat.

Angut 36-nik ukiulik nal. 21.30 missaani tigusarineqarpoq, akunnernilu sisamani aqquserngit assersorneqarsimareersullu, aqquserngit ammarneqaqqipput.

Powered by Labrador CMS