Skip to main content

Anguniakkanik allannguineq: Namminiivilinnissaq Atassummit anguniarneqarunnaarpoq

Partiip aallaavia ingerlateqqinneqartariaqalersoq Atassut aalajangerpoq. Atassutip siulittaasortaava Sermitsiaq.AG-mit apersorneqarpoq

Namminiilivinnissaq pillugu apeqqummi Atassut isummamik allanngortitsivoq. Partiip aallaavittut isumaa maanna malinneqaqqilerpoq.

- Namminiilivinnissaq pillugu politikkimik allannguisoqarsimanera Atassummi kukkussutit annersaat ilagaat. Naalagaaffeqatigiinnerup attanneqaannarnissaa sulissutigissavarput.

33-nik ukiulik Aqqalu Jerimiassen Sermitsiaq.AG-mut oqarpoq. Taanna Atassummi siulittaasunngorpoq arfininngormat. 2017-mili siulittaasuusimasoq Siverth K. Heilmann taamaasilluni siulittaasutut taarserlugu.

Namminiilivinnissaq nukinnik atuiffigineqassanngitsoq

- Atassutip tunngavittut isumaat uterteqqinneqarput, tassa Lars Chemnitzip isumai malillugit ingerlasoqaqqilissaaq. Naalagaaffeqatigiinneq tapersersugaraarput. Namminiilivinnissaq nukinnik atuiffigissanngilarput, taamaattoq nunatta qanoq siuarsarsinnaanera nukinnik atuiffigissavarput. Nunanit pissaanilinnit Nunarput ungalusimaneqarpoq, taamaattumik nukittuumik Naalagaaffeqatigiittoqarnissaa pingaaruteqarpoq, Aqqalu Jerimiassen oqarpoq.

Namminiilivinnissaq ukiuni tulliuttuni anguneqarsinnaanissaa piviusorsiornerunngitsoq naqissuserpaa.

- Namminiilivinnissarput nukinnik atuiffigissanngilarput. Danmarki qanimut suleqatigaarput, tamanna mittarfinnut tunngatillugu aalajangiinermi takoreerparput. Suleqatigiinnerput nukittorsarneqassaaq. Niuernikkut nunanik allanik Nunatta suleqateqarsinnaanera tullinnguullugu anguniarneqarsinnaavoq, tassani Danmarki aamma suleqatigineqassaaq. USA-mi, Canadami kiisalu Amerikami Kujallermi inoqqaat qanoq atugaqarnersut puigorneqartarpoq, taakku maanna tuluttut, portugisiskisut aamma spanskisut kisimik oqalulernikuupput. Danmarkip ataqqivaatigut, tamanna tulluusimaarutigisariaqarparput, Aqqalu Jerimiassen oqarpoq.

Politikkikkut ersarissaaneq

- Inuussutissalerinermut tunngasut angerlaanneqarnissaat Atassummit ilaatigut sulissutigineqarnikuuvoq. Sulianik angerlaassuinissaq tamaannga killeqassasoq Atassut isumaqarpa?

- Suliat angerlaanneqarnissaat aamma Namminiilivinnissaq suliaapput immikkoortut. Savalimmiormiut tamanna angerlaannikuuaat, taamaattoq nuna namminiilivinnissamik sulissuteqartuunngilaq. Aamma suliaq sukkasuumik angerlaanneqarnissaa sulissutiginikuunngilarput - Nunatsinnut angerlaanneqarnissaa iluaqutaassappat aatsaat angerlaanneqassasoq isumaqarnikuuvugut, akivoq.

- Siulittaasutut pingaarnertut suna suliarissaviuk?

- Qinersisartut nalussanngilaat Atassutip suna anguniagarineraa. Qularineqassanngilaq suna anguniarneripput - taamaattumik tunngaviusumik anguniakkagut maanna kusassarlugit suliarileruttorpagut, Aqqalu Jerimiassen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER