Anguniagaq: Ilulissat 2050-mi CO2-mik mingutsitsiffiussanngilaq
Avannaata Kommuniata Ilulissat 2050-mi CO2-mik mingutsitsiffiunngiutsutut nittarsaakkumavaa. Taamannammi anguniagaqarneq nunat tamalaat akornanni tapiissutinut suleqateqarnermut iluaqutaasinnaavoq.
Ilulissat 2050-mi CO2-mik aniatitaqarunnaarsimassaaq.
Avannaata Kommuniani piujuartitsinermik immikkoortortaqarfik taama ussassaarinissamik ilaatigut suliaqassasoq, kommunalbestyrelsep ataatsimiinneranit imaqarniliami taama allassimavoq.
- Tamanna kommunip ussassaarutigineranut assut naleqartitsissaaq, aammalu aningaasaateqarfinnit tapiissutinut nunallu tamalaani suleqatigisassanut periarfissiissalluni. Ilulissat tassaavoq alloriarneq siulleq, piffissalli ingerlanerani illoqarfiit sinnerisa allatut ingerlatsitsivigilernissaannut kommune aamma sulissuteqarsinnaavoq, immikkoortortaqarfik siunnersuummini allappoq.
Suliamut milliuunit koruunit affaat
CO2-mik aniatitaqarunnaarnissamut nunat tamalaanut nalunaaruteqarnissamut suliniummi alloriarneq siulleq tassaassaaq kommunip maanna CO2-mik qanoq annertutigisumik aniatitaqarneranut nalunaarusiornissaq, taamatullu silap pissusianut suliniuteqarnermut pilersaarusiornissaq, ilisimatitsissutigineqarpoq.
Illoqarfiup CO2-mik aniatitaqanngitsutut ussassaarinermut aningaasat 500.000 koruunit missaat atorneqassasut missingersuutigineqarpoq.
Suliassat allat
Piujuartitsinermik immikkoortortaqarfik pingasunik allanik aappaagumut suliassaqarpoq.
Piujuartitsineq pillugu isumasioqatigiissitsineq: Naalakkersuinermik ingerlatsisunut, sulisunut, peqatigiiffinnut suliffinnullu namminersortunut piujuartitsineq pillugu isumasioqatigiissitsinikkut piujuartitsinikkut anguniakkani pillugit kommune ilisimasanik tunniussaqarsinnaavoq, aammalu suliaqarfiit apeqqutaatinnagit nutaanik suleqatigiinnissanut periarfissiilluni.
Piujuartitsisutut ineriartortitsinissamut agguaassassat: Piujuartitsinissamut ingerlanniakkanut ilalersuisunik suliarisanik suliniutinillu nammineq aallartitsinikkut inerisaanermi kommunimi innuttaasut peqatigiiffiillu sunniiviginneqataanissaat agguaassassanut siunertaavoq.
Attaveqaqatigiinnermik paasisitsiniaaneq: Kommunimi tamarmi piujuartitsinermut tunngatillugu paasinninnermik pimoorussinermillu pilersitsiniarluni attaveqaqatigiinnermik paasisitsiniaaneq pilersaarutaavoq. Paasisitsiniaanermiissapput kommunimi tamarmi tunngavissiissutit isumasioqatigiinnerillu, kiisalu paasisitsiniutitut atortussat. Tamakku saniatigut piujuartitsisutut suliarisat nutaat suliffiup iluani avataanilu nalunaarutigineqartuartassapput.