Angummit persuttaasartumit Danmarkimut qimaasoq

Maliina 2017-imi Danmarkimut pivoq.

- Apriilip 24-at, ulloq taanna eqqaamaqqissaarpara, taanna oqarpoq.

Ulloq taanna arnap inuusuttup eqqarsaataani taama ersaritsiginera, ukioq ataatsip missaanit siusinnerusukkut angummit qimaalluni avissaarnermik pissuteqarpoq. Taanna timikkut tarnikkullu arnamut nakuusertarsimavoq. Taassumunnga ersineq annertuvoq.

- Illoqarfeqatigiinnarsinnaasimanngilara. Naak suna tamaat, ilaquttakka ilanngullugit pilliutigisariaqaraluarlugit, taamatut annertuumik alloriartariaqarsimavunga.

Sapinngisamik ungasinnerpaamut

Nuunnissani ukioq ataaseq pilersaarusiorsimavaa. Kisianni naak qimareeraluarlutik angutip nakuusertarnini attatiinnarpaa.

- Nuussinnaanngitsunga oqaqattaarpoq. Nakkarsarlunga sioorasaartarpaanga. Kisianni nuunniarlunga aalajangiusimavara.

Københavnimut nuunnissamut aalajangernera, siornatigut illoqarfimmi najugaqareerneranik pissuteqarpoq. Kisianni taanna kisimi pissutaanngilaq.

- Nuummut imaluunniit Kalaallit Nunaanni illoqarfimmut allamut nuukkusunngilanga. Uikunnit sapinngisara tamaat ungasissumut aallarusukkamat, sumiiffimmut tikeriaannaanngisaanut.

Angerlarsimaffeqanngitsoq

Kisianni Københavnimiinnera nuannersuinnaanngilaq. Pisatai ikinngutaani Sjællandimi inissinneqarput, kisianni tassani tikilluaqqusaasutut misigisimanngilaq. Tamatumunnga taarsiullugu Københavnimi angerlarsimaffeqanngitsunngorpoq. Illoqarfimmi nalunngisamini unnuisarpoq.

- Ilaannikkut piffissaq kingulleq sumiiffissarsisarpunga. Tamanna annertuumik killissannik qaangiineruvoq, tassami siornatigut angerlarsimaffeqanngitsutut inuunikuunngilanga.

Imminut naleqartinnginneq

Arnat nakuuserfigineqartartut allat assigalugit, imminut naleqartinnera aamma tatiginera uita nakkartikkiartorsimagaa, Maliinap nammineerluni misiginikuuaa. Tamatumalu aamma saniatigut angerlarsimaffeqanngitsunngorluni.

- Naqqammivippunga. Imminut naleqartinnera aamma tatiginera tamarmi tammarpoq.

Tassungalu killikkaanni amerlasuut ingerlanerlulertarput. Kisianni Maliina iluatsitsisut ilagaat. Qaammatit marluk qaangiuttut pisariaqartitaminik ikiorneqarpoq.

Ikinngutaata København Nordvestkvarterimi Morgencaféqarneranik oqaluttuuppaa, tassani nerisaqarsinnaallunilu inuttut isumagineqarsinnaasoq.

Allanngorfik

Kisianni pingaarnertut suliniut ’Et Godt Liv’ aqqusaarpaa, tassani kalaallit arnat inuuniarnermikkut ajornartorsioqqajaasunik Danmarkimi aqqutissiuussisoqartarpoq. Taannalu allannguisuuvoq.

- Suliniutip taassuma eqqortumik ingerlanissannut sangutippaanga, taanna oqarpoq.

'Et Godt Liv'-imi piffissami ukiuni pingasut missaanni arnat 30-t missaanniittut ikiorneqarput, tassanilu Maliinatut oqaluttuassartallit ilisarisimaneqarluarput.

- Amerlausuut nakuusertartunik aappaqarlutik imaluunniit meeraanerminni kinguaassiutitigut kannguttaatsuliorfigineqarneq misiginikuuaat. Misigisat kingunerlutsitsisartuupput, taamaalillutillu ikiorserneqartigatik inuunermi ingerlariarneq ajulertarput, Løkke Munk Kierkegaard oqarpoq, taanna suleqatinilu Susanne Gram-Hansenilu suliniuteqartuupput.

Nammineersinnaalernissamut ikiorserneqarneq

Suliniut tunngaviusumik danskit ingerlatseriaasiannut arnanut takornartaasumut aqqutissiuussiffiuvoq. Kisianni pingaarnertut arnat kissaataannik aamma taakku qanoq angunissaannik tapersersuiffiuvoq.

- Suliniummut peqataaninni imminut naleqartinninnik aamma tatiginninnik annertusititsivoq. Aallaqqaammulli tassunngarama toqqissisimasutut misigivunga. Akuerineqarpunga aamma tusarnaarneqarpunga, Maliina oqaluttuarpoq.

- Uikunnit ajornartorsiutikka aamma tassani oqaluuserisinnaavakka.

Najugaqarfissamik nassaarnissamut ikiorserneqarpoq. Aallaqqaammut angerlarsimaffeqanngitsunut sivisunngitsumik kollegiamiippoq, kingornalu Miteq najugaqarfigaa, kalaallinut arnanut Kofoed Skolemiittunut utaqqiisaasumik angerlarsimaffik. Tamatuma saniatigut oqalutsitut freelancerluni sulilerpoq, aallaqqaammut akunnerni amerlanngitsuni kingornalu amerlanerusuni.

Nakkaqqinneq

Ullumikkut toqqissisimasutut misigilernini sioqqullugu Maliina ataasiarluni atugarlioqqeqqaarpoq. Mitermi najugaqartut allat marluk aaqqiagiinngissuteqarfigai, juullinngitsiartorlu allamik inissarsioqquneqarpoq.

- Tassani eqqugaarujussuartutut misigisimavunga, minnerunngitsumik juulliliivimmat. Soorlu imminut naleqartinnera pigilersimasara tammaqqittoq. Angerlarsimaffeqanngitsutut misigisimallunga.

Kiisami toqqissineq

Taamaakkaluartoq akiuukkusunnermik pigisaqalersimavoq. Ikiorserneqarluni februaarip aallaqqaataani inissiamik nassaarpoq, taannalu suliniummut attuumassuteqanngilaq, nammineq najugaraa.

- Oqiliallannartorujussuuvoq. Maanna nammineq najugara pissarsiaraara. Københavnimut tikikkamali toqqissisimaneq anguniagara nassaaraara.

Maliina toqqissiimineroriaruni aalajangersimasumik suliffittaarnissani imaluunniit ilinnialernissani anguniassanerlugu paasiniassavaa.

Suliniut 'Et Godt Liv' Danmarkimi isumaginninnermut ministeriaqarfimmit aningaasalersorneqarsimavoq, kisianni aningaasat nungupput. Juullimiliilli arnat kalaallit amerlanerusut ikiorneqarsinnaasimanngilat.

Projekt kan 'Et Godt Liv' har været i to finansieret af Socialministeriet, men nu er midlerne løbet ud. Side jul kan men her ikke hjælpe flere grønlandske kvinder.

Maliina ativiginngilaa, taassuma arnap inuusuttup uikuni pissutigalugu kinaassutsimik isertuusserusukkami. Aaqqissuisoqarfiup ativia ilisimavaa.