Angummik nunatsinnut attuumassuteqartumut toqutsinerup kingorna inuit pingasut parnaarunneqarput
Angut 38-nik ukiulik nunatsinnut attuumassuteqartoq, aanngajaarniutinik atornerluisut akornanni aaqqiagiinngittoqarnerani Aalborgimi toqutaavoq. Angutit marluk arnarlu ataaseq inatsit tunngaviusoq aallaavigalugu ullumi killisiorneqarput, pisumi pasisatut inissisimallutik.
Obs. Inuit taakku pingasut tigummigallarneqarnerat pillugu allaaserisaq nutarterneqarpoq.
Angut 38-nik ukiulik Aalborgimi aqqusinermi arfininngornermi unnukkut toqutaavoq.
Angutit marluk arnarlu ataaseq Nordjyllandip Politiivinit angummik 38-nik ukiulimmik, Aalborgimi Rendsburggademi atuakkanik atorniartarfiup eqqaani arfininngornikkut unnukkut toqutsisimasutut pasisaallutik tigummigallarneqarput.
Nordjyllandip Politiivi tusagassiorfinnut taama nalunaaruteqarput.
Danskit nutaarsiassaqartitsiviat Ekstrabladet.dk naapertorlugu toqunneqartoq angutaavoq nunatsinnut attuumassuteqartoq. Ilaqutaasut politiinit kalerrinneqarsimapput.
Nordjyllandip politiivi tusagassiorfinnut allapput toqutsineq aanngajaarniutinik atornerluisut aaqqiagiinngissuteqarnerannit pissuteqartoq.
- Qanorpiaq pisoqarsimanersoq suli inissivinngilaq, periarfissalli arlallit misissorpagut, Nordjyllandip Politiivini vicepolitiinspektør Sune Myrup tusagassiorfinnut nalunaaruteqarnermi oqaaseqarpoq.
Ekstra Bladet naapertorlugu inuit tigummigallarneqartut pingasut, toqutsinermut tunngatillugu inatsit tunngaviusoq malillugu maanna killisiorneqarput.
Inuit taakku pingasut sapaatip-akunnerini sisamani tigummigallarneqalertut, taakkualu parnaarussaanerminnik suliassanngortitseqqissimanngitsut, Nordjyllandip Politiivi ilisimatitsipput.
Misissuineq pissutigalugu politiit allanik oqaaseqarusunngillat.