Angerlarsimaffiup avataanut inissinneqarsimasut ilungersuuteqarnerulersartut
Ulloq unnuarlu paaqqinnittarfiit ukiumut nalunaarutaat ataatsimoortunngorlugit eqikkakkami atuarneqarsinnaavoq ulloq unnuarlu paaqqinnittarfimmi najugaqartut tarnikkut inooqataanikkullu ajornartorsiuteqaleriartorsinnaasartut. Sulisut pikkorissartuarnissaat pingaaruteqartutut nalilerneqarpoq.
Meeqqat inuusuttullu ulloq unnuarlu paaqqinnittarfimmi inissinneqarsimasut inissinneqarnermi tunngavigineqartut qaavatigut inuuniarnermikkut unammillingassaqarnerulersarput.
Meeqqanut, inuusuttunut ilaqutariinnullu naalakkersuisoqarfiup ulloq unnuarlu paaqqinnittarfiit pillugit ukiumoortumik nalunaarusiaani taama ilisimatitsisoqarpoq.
Najugallit amerliartuinnartut pissusilersornikkut ajornartorsiuteqarnerat kiisalu tarnikkut inuttullu ajornartorsiuteqartut ulloq unnuarlu paaqqinnittarfimmut inissinneqarnerinut pingaarnertut pissutaasarpoq, ukiumoortumik nalunaarusiap aallaqqaasiutaani allassimavoq.
Sumiginnarneqarneq pinngitsuuisinnaajunnaarnerlu
Meeqqat inuusuttullu ulloq unnuarlu paaqqinnittarfimmut inissinneqarsimasut amerlasuut inissinneqannginnermi sumiginnarneqarnermik, kinguaassiuutitigut kannguttaatsuliorfitinnermik imigassamillu ajornartorsiuteqarnermik misigisaqarsimasarput. Najugaqartullu qanoq pissusilersornissamik angerlarsimaffimminni ilinniartinneqarsimasaratik.
- Ineriartornerneq taanna sulisut piginnaasaannut piumasaqarfiuvoq. Perorsaanikkut immikkut ilisimasaqarnissap annertusarneqarnissaa pisariaqartinneqarpoq, ulloq unnuarlu paaqqinnittarfiit pillugit ukiumoortumik nalunaarutaanni 2020-moortumi allassimavoq.
Ilanngullugu ilisimatitsissutigineqarpoq ulloq unnuarlu paaqqinnittarfinni sulisut pikkorissartuarnissaat isumaginninnermut aqutsisoqarfiup ukkatarigaa.
Suliffik oqimaatsoq
Nunatsinni ulloq unnuarlu paaqqinnittarfiit 22-iupput, katillugit 325-t missaannik najugaqarfigineqarsinnaallutik. Aqqanillit Namminersorlutik Oqartussanit ingerlanneqarput, qulingiluat nammineq pigisuusut kiisalu pingasut kommuninit ingerlanneqarlutik.
Ulloq unnuarlu paaqqinnittarfinni ajornartorsiut uteqqiattoq tassaavoq sulisut taarseraattarnerat, ukiumoortumik nalunaarusiami inerniliussanut ilaavoq.
Sulisulli taarseraanneri aporfiginagit ulloq unnuarlu paaqqinnittarfinni perorsaanermi suliniutinut ataavartumik sakkussaqartoqarpoq. Tassalu pinngortitaq, naalakkersuisoqarfik ukiumoortumik nalunaarusiami allappoq.
- Meeqqat amerlanertigut pinngortitami toqqissimalersarput, tamannalu oqaloqatigiinnissamut inissaqartitsilersarluni, ammartinnissaat nalinginnaasumik sapernarsinnaagaluartut. Pinngortitaq taamaalilluni attaveqatigiinnermik, akisussaaffeqarnermi, akuersinermi attuumassuteqarnernilu sulinermut il.il. tunngaviulluarsinnaasutut atorneqarsinnaavoq, naalakkersuisoqarfik ukiumoortumik nalunaarusiami allappoq.
Sulisut taarseraattut
Aammali sulisut ilinniarsimasut amigaatigineqarput.
- Paaqqinnittarfiup ataatsip oqaluttuaraa, najugallit sakkortuumik qisuariarlutik pissuseqartarneri pissutigalugit sulisut soraartarneri ataavartumik unamminartuusoq. Meeqqat unammilligassaat pissusilersornerminnullu tunngaviusut pillugit annertunerusumik ilisimasaqalernerup, sakkortuumik qisuariarluni pissusilersortartut qanoq iliuuseqarfiginissaannut sulisut pitsaanerusumik piareersarneqarsinnaapput, ukiumoortumik nalunaarusiami allaatigineqarpoq.
Ukiumoortumik nalunaarusiami erseqqissarneqarpoq sulisut pikkorissartuarnissaat isumagininnermut aqutsisoqarfiup ukkatarigaa, pikkorissaanissamullu iliuuseqartoqartoq.