Angerlarsimaffippassuarni akiitsut amerliartuinnartut: »Aliasunnarpoq ajorlunilu«
Akiitsut milliardip aappaa avillugu amerlatigilerput. Ilaqutariit pisortanut akiitsuisa amerliartuinnarneri politikerit ernummatigaat.
Pisortanut akiitsoqarpit?
Kisimiinngilatit. Innuttaasorpassuit akiitsoqarput. Akileraartarnermut Aqutsisoqarfiup akiitsunut naatsorsuutaasa kingulliit tamanna uppernarsarpaa. Akiitsut milliardip aappaa avillugu sinneqalaartut januaarimi naatsorsorneqarput, kisitsisinngorlugit: 1.564.979.011 koruunit. Januaarimut 2022-mut sanilliullugit 150 millionit koruuninik amerleriarsimapput. Akiitsulinnut suliat aamma amerliartuinnavipput. Kisitsisit amerlasoorujussuupput. Akileraartarnermut Aqutsisoqarfiup kisitsisaatai 2022-mi januaarimeersut suliat 508.722-upput, taannalu kisitsit 2023-mi 643.259-imut amerlisimavoq. 25 procentinik amerleriarneq.
Aviisi AG taama allappoq.
Unammilligassat Aningaasaqarnikkut Ingerlatsineq pillugu Nalunaarummi aningaasaqarnermut nalaakkersuisoqarfimmeersumit Inatsisartunut saqqummiunneqarput.
Nalunaarut aallaavigalugu Demokraatit siulittaasuata Jens-Frederik Nielsenip kisiartaalluni akiitsut amerliartuinnavinnerat oqallinnermi qaqippai.
- Innuttaasut pisortanut aakitsui amerleriapiloorsimapput. Tupinnanngilaq Naalakkersuisummi ajornartorsiutip iliuuseqarfiginissaa qunugaat. Akiliisitsiviup Ilanngaassiviup atuutilernissaa taamaatippaat tamannalu inuiaqatigiit aningaasaqarniarnerannut ukiut tamaasa 30 millionit koruuninik ajornerulernerannik kinguneqarpoq. Taassuma saniatigut ilaqutariinnut pisortanut akiitsutigut annertusiartuinnarfiusunut nuanniitsumik inissisimalersitsivoq. Ajorpoq, oqarpoq.
Akiitsoqartunut siunnersuisarnerup ajornartorsiut annertooq aaqqiivigisinnaagaa Jens-Frederik Nielsenip qularaa:
- Sunniuteqarsimanersoq takusinnaanngilara, qularaaralu Naalakkersuisut tamanna aallartissimaneraat. Inunnut inuiaqatigiillu aningaasaqarnerannut ajornartorsiutaavoq Naalakkersuisullu iliuuseqartariaqarput pisarnertut minnerpaamik aalajangiinissaq ersigiunnaarlugu, D-p siulittaasua appisaluussivoq.
Aviisimi AG-mi atuarnerusinnaavutit. Aviisi uani pissarsiariuk:
