Angerlarsimaffinni katerisimaanerit inerteqqutaanngitsut
Apersortittussat 25-t kaffillersinnaapput, angerlarsimaffinnilu festerinerit inerteqqutaanngillat. Naak Nuummi neriniartarfiit timersortarfiillu matuneqaraluartut, Nuummiillu angallannerit ataasinngorpat tungaanut annikinnerpaaffissaminiitinneqaleraluartut.
Inuit angerlarsimaffinni imertarnerat imerniartarfinniit imertarnernut annikinnerusoq, Naalakkersuisut isumaqarput. Taamaammat angerlarsimaffinni namminerluunniit aaqqissuusani katerissinnaanermut maleruaqqusat allangortinneqanngillat.
- Assigiinngillat. Imerniartarfinni imigassamik aalakoornartortalimmik atuisimalluni killeerusimaarneq qaninnerulertarmat. Taavalu ukua oqaluffinni eqqissillutik najuullutik peqataassamarta, taanna assigiinngissutaa maluginiaqquneqarpoq, Peqqissutsimut Naalakkersuisoq Kirsten L. Fencker (N), Sermitsiaq.AG-imut oqarpoq.
Sapaatiuppat Annaassisitta Oqaluffiani 25-t apersortissapput. Ilaqutariit ukioq ataaseq sioqqullugu apersortitsinissamut piareersartarput. Ilaquttat kammalaatillu sineriammeersut Danmarkimeersulluunniit tikeraariartortarlutik.
- Pingaaruteqarpoq napparsimagaanni ersiuteqaraanniluunniit katerisimaarfimmi najuutinnginnissaq. Najuuniaraanni qanermut assiaqut atorneqassaaq, Naleqqameersoq Kirsten L. Fencker oqarpoq.
Nuuk matuvoq
Neriniartarfiit, cafeet, imerniartarfiit timigissartarfiillu matuneqarput, timersornerillu tamaasa unitsinneqarput, tuniluuttoqarnissaa ingalassimaartinniarlugu. Taamaakkaluartorlu angerlarsimaffinni katerissinnaaneq, kaffillersinnaaneq, angerlarsimaffinnilu imigassartorluni festersinnaaneq unitsinneqanngillat.
- Killilerneqanngillat. Kaffillertoqarsinnaavoq angerlarsimaffinniluunniit katerittoqarsinnaavoq. Taamaallaat sakkortuumik innersuussutigaarput eqqarsaatigilluagaassumik aaqqissuisoqartarnissaa, Peqqissutsimut Naalakkersuisoq oqarpoq.
Angerlarsimaffinni katerinnermi inuiaqatigiit akornanni tuniluuttoqalissagaluarpat akisussaaffik inuiaqatigiinnut miloriunneqanngitsoq, Naalakkersuisut isumaqarput.
- Nalunartuaannarpoq. Kisianni pingaarnertut imerniartarfiit tusarnaartitsinerit isiginiarnikuuagut. Killeerusimaarnermik pissuseqalersitsisinnaasut, Kirsten L. Fencker naggasiivoq.
Timersornerit qanoq imerniartarfinnut sanillersuunneqarsinnaanersut Sermitsiaq.AG-iip akissutissarsiffiginngilaa.