Angerlarsimaffinni eqqissiviilliornerit aalakoortullu ulapititsisut
Politiit tallimanngornermi ualikkumiilli imigassartorsimanermut attuumassutilinnik ulapputeqarsimapput.
Sapaatip-akunnerata naanerata aallartinnera politiinut ulapinnerujussuarmik kinguneqarsimasoq, pigaartut pisortaat Malik Olesen oqaluttuarpoq.
Politiit tallimanngornermi ualikkut sisamaniilli pisorpassuarnut, tamarluinnangajammik imigassartorsimanermut attuumassutilinnut, orniguttariaqartarsimapput.
Pigaartut pisortaat naapertorlugu suliassat, nuna tamakkerlugu agguataarsimasut, makkuusimapput:
- Aalakoorpallaartut imminnut isumagisinnaanngitsut 14-it
- Angerlarsimaffinni eqqissiviilliornerit qulit + angerlarsimaffinni eqqissiviilliornerit marluk meerartaqarfiusut
- Inunnik kissaatigineqanngitsunik pisut arfineq-marluk, politiit inunnik najukkamit qimagutsitsiartorlutik orniguffigisariaqarsimasaat
- Aqqusinermi perulluliornerit tallimat
- Imerniartarfinni perulluliornerit pingasut
- Nakuusernermik suliat tallimat
- Imminut toqoriarnerit marluk, imminut toquttoqarnera ataaseq aamma imminut toqunissamik sioorasaarinerit arfineq-marluk
Tamatuma saniatigut politiit qamuteralannik Nuummi majuartaateqarfiup eqqaanit aallarunneqarsimasunik nalunaarummik aamma tigusaqarsimapput. Aallarussineq nal. 22 aamma arfininngornerup unnuaani nal. 01.30 pisimassangatinneqarpoq.
Politiit politiit nakuuserfigineqarnerannik suliamik aamma pilersitsisimapput. Nakuusersimasoq aserorterinermik suliamut aamma akuusimavoq.
- Ullup unnuallu ingerlanera ulapaarfiungaatsiarsimavoq. Maannakkorpiaq pigaartunut sianertoqartarnera akuttortiimivoq, kisiannili suli sianertoqartarluni, Malik Olesen arfininngornermi ullup-qeqqata siornatigut Sermitsiaq.AG-mut oqarpoq.