Angerlarsimaffiit imerniartarfittut atorneqarsinnaanerat ernummatigineqartoq

Naalakkersuisut nunami sassaallertarfinnik unnukkut quliniit ullaakkut tallimat tungaanut matusinerannut atatillugu, Qeqqata Kommunia kommunini kisiartaalluni imigassamik tuniniaasarnermik matusisoqarnissaanik qinnuteqarsimavoq.

Kommunit allat imigassamik inerteqquteqarnermik atuisoqannginnaassa maannamut aalajangersimavaat, tamannalu meeqqat pisinnaatitaaffiinut sullissivimmi MIO-mi ernumanartoqartinneqarpoq.

Meeqqat illersuisuata Aviâja Egede Lyngep ernummatiginerarpaa, ilaqutariit meerartallit arlallit angerlarsimaffiini ernguttoqarnerulernera, fiistertoqarnerulernera perulluliortoqarnerulerneralu meeqqanut ajoqusiisinnaanerat.

- Siusinnerusukkut matusisoqartarnerani nalunngilarput, imerniartarfiit matugaangata angerlarsimaffinni persuttaasoqarnerulersartoq, Aviâja Egede Lynge Sermitsiaq.AG-mut oqarpoq. Taassuma erseqqissaassutigaa, imigassamik inerteqquteqarneq coronap maanna tuniluunnerujussuanik killileeqataasinnaasoq.

- Meeqqat matuseqqusisinnaanngitsut

Meeqqat Illersuisuata Qeqqata Kommunia iliuuseqarmat nersualaarpaa, isumaqarami imigassamik inerteqquteqartoqarneratigut sassaallertarfiit matuneqarnerisa kingunerluutigisinnaasaat annikillisissagai.

- Inuussutissarsiutinik ingerlatsisut suliffeqarfimminnik eqqarsaatiginnittusaanerat ataqqivara. Meeqqat sinnerlugit oqaaseqarpunga. Meeqqammi matuseqqusisinnaanngillat, taakkumi namminneq inuunerannut tamanna kinguneqartussaavoq.

- Borgmesterit allat ernummanartoqarsinnaanerannik eqqarsaateqannginnerat ernummatigaara, Aviâja Egede Lynge oqarpoq.

Kalaallit Nunaanni Politiini politimesterip Bjørn Tegner Bay-ip Meeqqat Illersuisusata ernummateqarnera taperserpaa:

Angerlarsimaffinni eqqissiviilliortoqarnerulersinnaasoq, persutaasoqarnerulerlui kinguaassiuutitigullu innarliisoqarnerulersinnaalluni

- Kalaallit Nunaanni Politiinit nalilerneqarpoq, neriniartarfiit assigisaallu unnukkut qulinut matugaangata, neriniartarfinni nuannisartarnerit angerlarsimaffinni inuinnaallu najugaqarfiini allani ingerlateqqinneqarsinnaasut, Bjørn Tegner Bay allakkatigut oqaaseqaateqarluni allappoq, nangillunilu:

- Isumanga malillugu tamanna angerlarsimaffinni aalakoortunik katersuuttoqarneranik kinguneqarsinnaavoq, taamalu tunillaassuisoqarnera annertunerulersinnaalluni aama ilaatigut eqqissiviilliortoqarnerulersinnaavoq, persuttaasoqarnerulersinnaalluni kinguaassiuutitigullu innarliisoqarnerulersinnaalluni.

Politimesterip taamaammat politiitut nalilerpaa, pisiniarfinni imigassamik tuniniaaqqusaannginneq siunertamut naapertuutissasoq, sassaallertarfiit unnukkut quliniit ullaakkut tallimat tungaannut matoqqatinneqarneranni.

Qeqqata Kommunianut tapersiisoq

- Taamaaliorpunga tuniluuttoqarnerata annertusinnginnissaa anguniarlugu kiisalu angerlarsimaffinni ullumikkut eqqissiviilliortoqartarneratiut persuttaasoqartarneratigut kinguaassiuutitigullu innarliisoqartarneratigut inuiaqatigiinni ajornartorsiutigisartakkatta annertusinnginnissaat anguniarlugu. Tamakku amerlanertigut imigassartorsimanermi pisarput, meeqqanullu kingunerluuteqakkajuttarlutik – meeqqanut toqqaannartumik tuttarput imaluunniit meeqqat pisunik isiginnittarlutik, politimesteri allappoq.

Politimesterip erseqqissaassutigaa, tamanna tunngavigalugu Qeqqata Kommuniata kommunimi imigassamik inerteqquteqartoqarnissaanik Naalakkersuisunut piumasaqarniarluni aalajangersimanera tapersersorlugu.

Kommuneqarfik Sermersuumi borgmesteri Charlotte Ludvigsen (IA) sapaatip-akunnerani matumni siusinnerusukkut oqaluttuarpoq, kommuni imigassamik inerteqquteqalernissamik qinnuteqassanersoq eqqarsaatigalugu pissutsinik malinnaaniarluni, maannakkuugallartorli imigassamik inerteqquteqalertoqarnissaanik qinnuteqarnianngikkallarluni.