Angerlarsimaffeqanngitsuuneq pillugu suliaq coronap kinguaattoortikkaa
Nunatsinni angerlarsimaffeqanngitsuuneq pillugu aaqqiissutissanik siunnersuuteqartussatut suliaqartut, siusinnerpaamik ukiup naanissaata tungaanut kinguaatsoorput.
Corona pissutigalugu pissutsit allanngorneranni angerlarsimaffeqanngitsunut aaqqiissutissanik innersuussuteqarnissamik suliaqarneq maannamut kinguaattoorfiugallarpoq.
Isumaginninnermut naalakkersuisoqarfimmi immikkoortortaqarfimmi pisortaq, Kirsten Olesen Sermitsiaq.AG-mut ilisimatitsivoq.
- Misissuineq annertooq ingerlanneqarpoq, suliarlu nangeqqissimalerluni. Misissuinerit tiguneqareerpata innersuussutit suliarineqassapput, Kirsten Olesen ilisimatitsivoq.
Isumaginninnermut Naalakkersuisoq, Martha Abelsen siusinnerusukkut ilisimatitsisimavoq naatsorsuutigalugu innersuussutit maajimi ukioq manna tigusinnaassallugit. Suliarli siusinnerpaamik ukiup naaneranut naammassisussatut kinguartinneqarallarpoq.
Ataatsimiinnerit kingulliit pereerput
Immikkut ilisimasallit katersorneqarsimapput, ataatsimoorlutik aaqqiissutissanik innersuussaqartussanngorlugit.
Siunnersorteqarfik ataaseq suliakkerneqarsimavoq nunatsinni kommunini tallimaasuni angerlarsimaffeqanngitsut atugaat pillugit misissueqqissaaqqullugu.
Sociologi Ilisimatusarfimmilu lektori, Steven Arnfjord, immikkut ilisimasallit katersorneqartunut ilaavoq, innersuussutinillu suliaqaqataalluni.
Taassuma ilisimatitsissutigaa panel-i tallimanngormat augustip 28-ani naggataarutaasumik ataatsimiissimasoq, innersuussutillu arlallit suliarineqarsimasut.
- Nalunaarusiaq naammassilluinnalerpoq. Isumaqarpunga innersuussutit suliarineqartut naammassissallugit, angerlarsimaffeqanngitsullu ikiussallugit Naalakkersuisut aalajangiusimasut, Steven Arnfjord Sermitsiaq.AG-mut oqarpoq.
2017-imi kisitsinerup naqissuserpaa Kalaallit Nunaanni angerlarsimaffeqanngitsut taamani 841-sut. Ullumikkut kisitsisit eqqortut ilisimaneqanngillat, Naalakkersuisulli naatsorsuutigaat suli amerlanerulersimassasut.