Angerlarsimaffeqanngitsuuneq pillugu periusissiaqarneq ukioq ataaseq atareersoq: Suliniutinik atuutilersitsisoqanngilaq
– Oqaatigigaat tusaasinnaavara, kisianniatuutilersinneqarnerat suli takunngilara,angerlarsimaffeqannginneq pillugu ilisimatusartoq oqarpoq.
Naalakkersuisut angerlarsimaffeqannginneq pillugu periusissiaat ukioq ataaseq piusimalerpoq. Periusissaq annertuumik anguniagalik, allaaserinnittut oqaatigisaat naapertorlugit, angerlarsimaffeqannginnerup pinaveersaartinneqarnissaanik siamasissumik suliniuteqartitsisussaq.
Taamak allaaserinnippoq aviisi Sermitsiaq.
Suliniutit angerlarsimaffeqanngitsuunermik pinaveersaartitsisussat nukittorsarneqarnissaat, aamma »angerlarsimaffeqanngitsunngornissallu pinngitsoortinnissaanik pitsaaliorneqarnissaanillu aaqqissuussaanikkut aaqqissuussinermilu aallaaviit patajaallisaavigineqarnissaat suliarineqassasut«.
2023-mi innuttaasunut pinasuartumik najugaqarfissanik nassaarnissaq salliunneqarpoq kiisalu Nuummi nunatsinni angerlarsimaffeqanngitsoqarnerpaasumik Housing Firstimik suliniummik pilersitsisoqassasoq.
Tamatuma saniatigut nalaassimasanik kingunerlutitsisunut katsorsaavik kiisalu angerlarsimaffeqannginneq pillugu ilisimasaqarfimmik suliniuteqartoqartussaavoq.
Kisianni suliaq ukiumi kingullermi qanoq ingerlasimava?
Ilisimatusarfiup Issittumi Atugarissaarneq pillugu Ilisimatusarfiani lektori aamma pisortaq, Steven Arnfjord, aperissagaanni angusaqartoqarpallaarsimanngilaq. Taassuma Ilisimatusarfimmi ilisimatusartut peqatigalugit 2022-p naanerani Kalaallit Nunaanni angerlarsimaffeqanngitsut pisortatigoortumik siullerpaamik kisitseqataaffigai, taanna Naalakkersuisut periusissaannut tunngaviuvoq.
Suliniutinit arfineq-pingasunit Naalakkersuisut 2023-mi anguniagaat atuutilersinneqarsimanerannik takusaqarpit?
– Suli naamik, kisianni Housing Firstimik suliniummik aallartitsiniarneq aamma ajornakusoortorujussuuvoq.
Allaaserisaq tamaat aviisimi Sermitsiami atuaruk.
