Angerlarsimaffeqanngitsut pillugit suliniut ajornartorsiortoq: Angerlarsimaffeqanngitsut inissianut akiliiumanngillat
Angerlarsimaffeqanngitsunut inissianik suliniut inissiat inoqartinniarnerinik ajornartorsiuteqarpoq. Angerlarsimaffeqanngitsut ineqarnermut akileerusunngillat, Kommuneqarfik Sermersuumi ingerlatsivik taama nalunaaruteqarpoq.
Illoqarfiit pingaarnersaanni inissianik annertuumik amigaateqartoqaraluartoq, Kommuneqarfik Sermersuup angerlarsimaffeqanngitsunut suliniummi inissiat katitertakkat 24-t ulikkaarnissaat ajornartorsiutigaa.
Inissiat 24-nit qulit inoqanngillat, angerlarsimaffeqanngitsut inissianik neqeroorfigineqartut ineqarnermut akiliiumanngimmata. Ingerlatsiviup Atugarissaarnermut Suliffeqarnermut Ataatsimiititaliaanut ilisimatitsissutaani tamanna atuarneqarsinnaavoq.
Aaqqiissut angerlarsimaffeqanngitsunut inissiani ukiup affaani najugaqarnissamut periarfissaqartitsisoq, ingerlatsivik ilisimatitsissummi allappoq, tamatuma kingorna nalilersuisoqartassalluni – angerlarsimaffeqanngitsullu naammaginninngillat:
Naafferartumik akilersuititsineq misilinneqartoq
- Tassunga atatillugu paasinarsivoq, najugallit arlaqartut ineqarnermut akiliiumaneq ajortut, naak akiliisinnaagaluarlutik. Pingaaruteqarpoq erseqqissassallugu, innuttaasut matumani pineqartut, tarnikkut inuttullu ima annertutigisumik nanertugaanngimmata, allaat ineqarnermut akiliuteqarsinnaanatik, ingerlatsivik politikerinut allappoq.
Naafferartumillu akiliuteqartitsinernik assigiinngitsunik misileraasoqarsimasoq oqaloqatiginnittoqarsimasorlu, ingerlatsivik allappoq, kisianni aperineqartut aningaasaatitik ineqarnermut atornagit allamut atorusunneruaat.
Ingerlatsiviup nalunaarnera naapertorlugu, angerlarsimaffeqanngitsut unnuisarfianniinnissartik orniginartinnerullugu inissianut katitertakkanut ilaat qujaannarlutik nalunaartartut ajornartorsiutaavoq. Pineqartut tassaapput angerlarsimaffeqanngitsut unnuisarfianni atuisut 20-30-t, nuunnissaminnik kissaateqanngitsut, naak akissaqaraluarlutik periarfissaqaraluarlutillu:
Unnuisarfiup siunertaata akerlia
- Tamanna angerlarsimaffeqanngitsut unnuisarfiata siunertaanut akerliulluinnarpoq, tassani angerlarsimaffeqanngitsut allanik periarfissaqanngitsut pineqartarmata. Tamatuma saniatigut atuisut pineqartut allat, unnuiffissaminnik pisariaqartitsivissut, periarfissaraluannik tigusisarput, ingerlatsivik politikerinut taama allappoq.
Innuttaasoq inissiani katitertakkani inissamik neqeroorfigineqartillugu, pineqartup tigusinissaanik pisussaaffeqalersillugu inatsisit allanngortinneqarnissaat, ingerlatsiviup nalunaarutigaa.
- Taamaaliornikkut qulakkiissavarput, sapinngisamik amerlasuut kommunip neqeroorutaanik nuannaarutissinneqartut, aammalu angerlarsimaffeqanngitsut aalajangersimasumik angerlarsimaffeqalernissaminnut ingerlariaqqittut, ingerlatsivik allappoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...