Angerlarsimaffeqanngitsut pillugit Naalakkersuisoq isumasioqatigineqarniartoq

- Inuit Ataqatigiit ilaqutariinnermut inatsisinillu atuutsitsinermut naalakkersuisoq Martha Olsen Siumut apersorniarlugu aggersarpaat. Angerlarsimaffeqanngitsut atugarisaat oqallisigineqassapput.

- Angerlarsimaffeqannginneq pillugu apeqqusiat, Inuit Ataqatigiit angerlarsimaffeqanngitsunik naapeqateqareernerisigut pivoq, malitseqartitsinerlu manna aqqutigalugu pitsanngorsaatissanik ujartuivugut neriulluta Naalakkersuisut tigussaasunik suliniutinik saqqummiussiumaartut, IA sinnerlugu Juliane Henningsen tusagassiutinut nalunaarummi oqarpoq.

IA Naalakkersuisumut aqqaneq-marlunnik apeqquteqarput, ilaatigut apeqqutigineqarpoq qaqagu angerlarsimaffeqanngitsut akunnittarfittaassanersut. Naalakkersuinermut isumaqatigiissummi ilaavoq angerlarsimaffeqanngitsut akunnittarfittaarumaartut

- Kalaallit Nunaanni tamarmi inuit inissikkallarneqarsimasut qassiuppat, kisitsisillu taakku tamanut ingerlaavartumik saqqummiunneqartarpata tamanna isumaginninnermut ineqarnermullu politikkikkut iluaqutaassava?

- Inissinneqarallartut qaammatit pingasukkaarlugit nuuttannginnissaat pillugu allannguinissaq Naalakkersuisut sulissutiginiarpaat?

- Naalakkersuisooqatigiinnissamut isumaqatigiissut naapertorlugu Nuummi angerlarsimaffeqanngitsunut unnuisarfik sananiarneqartoq qaqugu naammassineqassava?

Aamma paaserusunneqarpoq inigisaminniit anisitaasimasut qassit inissaminnik tunineqarsimanersut

- 'Kalaallit Nunaanni Angerlarsimaffeqanngitsut' pillugit nalunaarusiaq tunngavigalugu suliniutinik nutaanik Naalakkersuisut pilersaaruteqarpat, aammalu inunnut angerlarsimaffeqanngitsunut periusissiamik iliuusissatullu pilersaarummik suliaqartoqarnissaanik pilersaaruteqartoqarpa?

Aamma angerlarsimaffeeruttussatut inissinneqartut qanoq ikiorserneqarsinnaanersut Inuit Ataqatigiinnit paaserusunneqarpoq.

- Innuttaasut angerlarsimaffeqaratik atornerluinermik ajornartorsiuteqartut ikiorserneqarnissaannut periusissatut atorneqarsinnaappat?

- Innuttaasunut angerlarsimaffeqanngitsunut inisseeqqittarnermullu tunngatillugu kommunit Naalakkersuisullu akornanni qanoq suleqatigiittoqarpa?

Angerlarsimaffeqanngitsut imaluunniit inuit angerlarsimaffeerussinnaanerminnut ulorianartorsiortut pillugit pinaveersaartitsinissamut periarfissanik kommunit ikiorserneqarnissaannut nutaamik inatsiseqalernissaanik pisariaqartitsisoqartoq Naalakkersuisut isumaqarpat? Assersuutigalugu angerlarsimaffeqanngitsunut naatsorsuussamik inisimmaveqarnermullu tunngatillugu immikkut aamma paragraffilimmik sullissinissamut inatsimmut assingusumik inatsiseqalernissaa pisariaqartinneqarpa?