Angerlarsimaffeqanngitsup inissianik ornittagaliornissaq nuannaarutigaa
Nuummi angerlarsimaffeqanngitsunut inissiassaq ornittagaq iluaqutaassaaq. Hans Peter Ananiassenip suliniut iluarisimaarpaa.
Ilungersuutit ernummatillu angerlarsimaffeqanngitsuni ikiliallassinnaapput. Kommuneqarfik Sermersooq aalajangerpoq Nuummi angerlarsimaffeqanngitsunut inissianik ornittakkanik pilersitsissalluni. Inissiat ukioq manna suliariumannittussarsiuunneqassapput, aappaagulu piareereersimassallutik.
- Taama suliniuteqartoqarnera nuannaarutigaarput. Eqqissiallannarpoq, Hans Peter Ananiassen oqarpoq.
Taanna Nuummi ukiuni aqqanilinni angerlarsimaffeqanngitsooreerpoq.
Angerlarsimaffeqanngitsut unnuisarfianni Cafe Kialaarfimmi ingerlatsisoq, Storm Ludvigsen oqarpoq, ininik atuisut suliniut toqqissiallaatigissagaat ilimagalugu.
- Inissianik ornittagaqalerpat toqqissiallaatigissavaat. Oqarfigisarsimavagut toqqit atorunnaarpata iliuusissaqartoqarumaartoq, Storm Ludvigsen oqarpoq.
Tapersersorneqarnissaq annertunerusoq
Inissialli kisimik angerlarsimaffeqanngitsut unammilligassaannik nungutitsinavianngitsut, Hans Peter Ananiassen erseqqissaavoq. Taanna isumaqarpoq angerlarsimaffeqanngitsut kommunimut saaffiginninneranni suleriutsimi ersarinnerusunik iliuusissanik periarfissaqartariaqartoq.
- Angerlarsimaffeqanngitsut ilaatigut tarnikkut eqqarsartaatsikkullu tapersersorneqartariaqartaramik, oqarpoq.
Toqqit angerlarsimaffeqanngitsunit maanna unnuiffigineqartartut attartorneqarnerat septemberip aallaqqaataani 2020-mi unissaaq. Angerlarsimaffeqanngitsut ornittagassaasa suliarineqarnerani blokkit inuerussimasut inissiaagallartussaapput.
Angerlarsimaffeqanngitsunut inissiaq ornittagassaq 2021-p qiteqqunnerani atulertussatut naatsorsuutigineqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...