Angerlarsimaffeqanngitsunngortarneq pinngitsoortinniarlugu immikkut ilisimasallit aaqqiissutissanik misissuissapput
Angerlarsimaffeqanngitsunngortarneq pillugu qulaajaasussat aaqqiissutissanillu nassaarniartussat, tassa suliaqartut peqatigiiffilerisullu ataasinngornermi decemberip aappaani 2019-imi ataatsimeeqatigeeqqaassapput.
Kisitsisit kingulliit takutippaat Kalaallit Nunaanni angerlarsimaffeqanngitsut 878-iusut. Kisitsisit 2017-meersuupput, nunatsinnilu qassit maanna angerlarsimaffeqanngitsuunersut ilisimaneqanngilaq.
Innuttaasut angerlarsimaffeeruttannginnissaat anguniarlugu Naalakkersuisut aaqqiissutissanik ujaasinissamut piareersimapput.
Suleqatigiittussat suliami immikkut ilisimasaqartut misilittagaqartullu maanna pilersinneqarput, taakkulu angerlarsimaffeqanngitsunngornissamut aarlerinartut, tassa ajornartorsiutit unammilligassallu pillugit qulaajaassapput, aaqqiissutissanillu nassaassallutik.
Taakkununnga peqataassaaq inuit innarluutillit illersuisuat Christina Johnsen. Inuit ersittumik ersinngitsumilluunniit innarluuteqartut angerlarsimaffeqanngitsunngornissaminnut qanoq aarlerinartorsiorsinnaanersut, tamannalu qanoq pinngitsoortinneqarsinnaanersoq pillugit, taanna apuussassaqarpoq.
- Minnerpaamik inissaqartitsisoqartariaqarpoq, soorlu tarnikkut napparsimasoq uninngareerluni anisussanngoruni, inissaqartariaqarpoq. Isumaginnittoqarfiup ataani inissiat amerlanerusariaqarput, taakkuussappullu inuiaqatigiinni sanngiinnerusunut tulluarsarsimasut, tapersersorneqarluni inissiarineqarsinnaasut. Eqqaamasariaqarparpummi inuk tarnimigut nappaateqaraluarluni tapersersorneqarluaruni ikiorneqarluarlunilu, taava inuunera ajunngilluinnarsinnaammat, inuit innarluutillit illersuisuat oqarpoq.
Tapersersuineq malitseqartitsinerlu pitsaanerusoq
Inuit peqqinnissaqarfimmi uninngasimasut, allatigut paaqqutarineqarsimasut imaluunniit pinerluuteqarsimasut inissiisarfianniissimasut pillugit tapersersuineq malitseqartitsinerlu pitsaanerusariaqartoq pillugu, inuiaqatigiilerinermut immikkoortortami pisortaq, lektori, ph. d. aamma sociolog, Steven Arnfjord isumaqataavoq. Inunnut arlaatigut paaqqutarineqarsimasunut minnerpaamik inissaqartitsisoqartariaqarpoq, inuit pitsaasumik inuuneqaqqilernissaat anguniarlugu.
- Eqimattat taakku takunngitsuusaaginnarneqarneri arlaannaatigulluunniit maannamut iluaqutaasimanngilaq, eqimattaq taanna alliartorpoq, Steven Arnfjord oqarpoq.
Inuiaqatigiit tungiuinermik tunngaveqartut
Kalaallit Nunaanni tungiuineq inuiaqatigiinni pingaartinneqarpoq, innuttaasullu qaffasingaatsiartumik akileraartarput.
Inuunerli ilungersunarsigaangat, soorlu suliffik annaaneqarpat, ilaqutaasumik annaasaqartoqarpat, imaluunniit aanngajaarniutinik pinngitsuuisinnaajunnaartoqartillugu, inuiaqatigiinnit ikiuutissat killeqarput.
- Inuttut sillimaniarnissami qassutit atorneqartut nigartaqarpallaarput (putukippallaarput, aaqq.), taamaasillutik eqimattat pisariaqartitsinerpaat, tassa inuuniarnermikkut ilungersuuteqarnerpaat, soorlu piffissami sivisuumi imigassamik aanngajaarniutinilluunniit atornerluisuusimasut, akorneqanngitsoortarlutik. Inuiaqatigiit sillimanissaannut ikiorneqarnissaannullu qassutit atorneqartut nigartakinnerusariaqarput, eqimattat peqataanissaminnut qaqinneqarnissaat siunertaralugu, Steven Arnfjord oqarpoq.
Kofoeds Skolemit, Frelsens Hærimi, qimarnguimmit allaniillu innuttaasut ikiorneqarnissamik pisariaqartitsisunik sullissisut, suleqatigiittunut peqataatinneqassapput. Siunnersuutit tigussaasut maajimi 2020-mi pissarsiarinissaat, isumaginninnermut naalakkersuisup neriuutigaa.