Angerlarsimaffeqanngitsunik kisitsinerup nutaap politikikkut oqallinnerit aallartissavai
Kisitsinissaq kisitsinissanit arlaliusussanut ilaavoq. Nunatsinni anglerlarsimaffeqanngitsut qanoq amerlatiginerannik taanna paasinarsititsissaaq. Kisianni paasissutissat eqqoqqissaartut pissarsiarinissaat ajornakusoorpoq, amerlasuut ersinngitsumik angerlarsimaffeqanngitsutut inuugamik – kisitsisaatigineqanngitsullu amerlapput.
Ukioq manna apriilimili Ilisimatusarfimmi ilisimatusartut suleqatigiit Nunatsinni illoqarfinni anginerni angerlarsimaffeqanngitsunik kisitsinermik suliaqarput, nalunaarusiarlu piariingajalerpoq.
Aviisi Sermitsiaq taama allappoq.
Angerlarsimaffeqanngitsunik kisitsisitsineq Isumaginninnermut Suliffeqarnermullu Naalakkersuisoqarfimmit suliakkiunneqarpoq, ilisimatusartunillu sisamanit aamma ilinniartutut ikiortinit sisamanit Ilisimatusarfimmeersunit suliarineqarpoq. Angerlarsimaffeqanngitsunik kisitsineq kisitsinissanit arlaliusunit siulliussaaq, kisitsineq siulleq periutsimik tulluarsaanerussammat, kingornalu kisitseqqittoqassammat.
Ataaseriarlunimi kisitsineq taamaallaat Kalaallit Nunaanni angerlarsimaffeqanngitsut qanoq amerlatiginerannik takussutissaq ataasiinnaassammat, paasissutissanillu aalajangersimanerusunik pissarsiniaraanni kisitseqqittoqartariaqarpoq.
- Kisitsineq siulleq inuit angerlarsimaffeqanngitsut qanoq amerlatiginerannik tullianilu qanoq iliornissamut takussutissiissaaq. Inuit qanoq amerlatigisut pineqarnerinik eqqornerusumik paasisaqarniarutta, piffissami sivisunerusumi arlaleriarluta kisitseqqaarnissamik pisariaqartitsivoq, Steven Arnfjord oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: