Angerlarsimaffeqanngitsoq quimi ikuallattumi uutitertoq

Ataasinngornermi ullaakkut Sisimiuni aqqusinermi Tuapannguanut inissiat quianni ikuallattoqarpoq. Qui aamma biili quimut qanittumi uninngasoq nungullutik ikuallapput.

Sisimiuni politikommissæri Karl Jørgen Lennert taama oqaluttuarpoq.

Angutip angerlarsimaffeqanngitsup ikumasartoq gassitortoq quimi atorsimammagu, ikuallanneq aallartissimasoq politiit ilimagaat:

- Ikuallattoq qaminniarsarisimavaa, taamaammallu assamigut uutitersimavoq. Eqqartuussivimmut sassartinneqarnissani ilimagissavaa, Karl Jørgen Lennert oqarpoq.

Kissasserniaraluartoq
Angerlarsimaffeqanngitsup kissasserniarluni ikumasartoq gassitortoq atorsimagaa taassuma ilimagaa.

Politikommissærip oqarnera naapertorlugu qui ikuallattoq inissiaqarfimmut qanittumi aqqusernup illuatunginnguaniippoq, taamaammallu innerup inissiamut anngunnissaa ernumassutigineqarsimavoq.

Innerli sukkasuumik qaminneqarpoq, kisianni qui biililu uninngasoq nungullutik ikuallapput.

Pisumut assingusumik pisoqaqqinnginnissaa anguniarlugu, innuttaasut quitik paarnaartassagaat Karl Jørgen Lennertip kajumissaarutigaa.

Innuttaasunut angerlarsimaffeqanngitsunut ukiuunerani issimik aniguiniarsarisunut tunngatillugu, kommunimi inunnik isumaginnittoqarfimmut ikiorserneqarnissamik attaveqarnissaat kaammattuutigaa.