Angerlarsimaannarnissamut piumasaqaateqaleqqittoqarsinnaavoq

Danmarkimi tunillatsissimasut amerlavallaarnerat pissutigalugu innuttaasut Danmarkimit tikittut ulluni tallimani angerlarsimaannartarnissaat Namminersorlutik Oqartussat atuutseqqilissallugu eqqarsaatigaa.

Danmarkimit angalasut Kalaallit Nunaannut tikinnerminni ulluni tallimani angerlarsimaannartarnissaat piumasaqaatinngorsinnaavoq. KNR allappoq.

Tusagassiorfittut innuttaasunik kiffartuussivik naapertorlugu, Corona pillugu sulisoqatigiit nalunaarutissamik nutaamik, angerlarsimaannartarnissaq pillugu malittarisassamik atuutsitseqqilertussamik suliaqarput.

Nalunaarulli politikkerinit akuerineqaqqaartussaavoq, Hans-Peder Barlach Corona pillugu sulisoqatigiit siulittaasuat oqaluttuarpoq.

Ullut tallimat qaangiunneranni misissortittoqartassasoq

Hans-Peder Barlach Christensen naapertorlugu Danmarkimi coronap tuniluunnerata annertusiartornera pissutigalugu allannguisoqarnissaa eqqarsaatigineqarpoq.

Taassuma Sermitsiaq.AG-mut nassuiaatigaa, ulluni tallimani angerlarsimaannartoqartarnissaanut, tamatumalu kingorna misissorteqqittoqartarnissaanut malittarisassat atuutseqqinneqalernissaat eqqarsaatigineqartoq.

- Ullut tallimat qaangiunneranni misissorteqqittoqanngippat, ulluni 14-ini imminut mattusimatittoqartassaaq, Hans-Peder Barlach Christensen Sermitsiaq.AG-mut oqarpoq.

Taassuma erseqqissaatigaa, pingaarnerpaasoq tassaasoq, innuttaasut ippigisaqartut peqqinnissaqarfimmut attaveqartarnissaat.

- Ippigisaqaraanni qanorluunniit pisoqaraluarpat peqqinnissaqarfimmut sianertoqartassaaq, Hans-Peder Barlach Christensen oqarpoq.

- Angalanissaq pisariaqarnersoq eqqarsaatigiuk

Taassuma inunnut kaammatuutigaa, Danmarkimut angalanissaq pisariaqarnersoq eqqarsaatigilluartaqqullugu:

- Maannakkut inuit eqqarsarluaqqaartarnissaannik piumaffigivavut. Danmarkiliarnissaq pisariaqarpa? Taamatut piumasaqarpugut, tuniluunnerup siaruaakkiartornerata aqunneqarsinnaannginnera pissutigalugu, Hans-Peder Barlach Christensen oqarpoq.

Nalunaarusiami allannguutaasinnaasut pillugit paasissutissat saqqummiunneqarput, Corona pillugu sulisooqatigit allattoqarfiani Danmarkimi tuniluunnerup annertuseqqinnerata kinguneqaatigisinnaasaannik tusagassiorfinnut soqutigisaqaqatigiinnullu allanut saqqummiunnissaq qanillilluinnartoq.

Coronamulli tunngatillugu sulisoqatigiit allattoqarfianni pisortaq Niels Ulrik Vinther suliamut tunngatillugu allamik Sermitsiaq.AG-mut ilisimatitsissuteqarsinnaannginnerarpoq, nutaamik nalunaarusiortoqarneranik ilisimasaqannginnini pissutigalugu.

Tunillatsissimasut nutaat 559-it

Sapaatip akunnerani kingullermi Nunatsinni Nakorsaanerup Henrik L. Hansenip aamma Peqqissutsimut Naalakkersuisup Anna Wangenheimip Danmarkimi tuniluunnerup siaruaakkiartornera ernummatiginerarpaat. Anna Wangenheimilli ilisimatitsissutigaa, nunamut tikinnermut atatillugu nalunaarut nutarterneqaleruttortoq.

AAMMA ATUARUK: Nunatsinnut tikinnermi innersuussutit nutaat: Allanut qanillinaveersaarit

Ritzau naapertorlugu Danmarkimi inuit allat 559-iusut coronavirusimik tunillatsissimapput. Statens Serum Institup sisamanngormat kisitsisaataasa tamanna takutippaat.

Uninngasut 17-inik ilasimapput, uninngasullu katillutik 95-inngorsimallutik. Juunip sisamaanili aatsaat taamak amerlatigisut unitsinneqarsimapput.

Inuit marluk toqukkut qimagussimapput, taamaalilluni Danmarkimi coronavirusimik toqussuteqarsimasut katillutik 645-nngorsimallutik.

Powered by Labrador CMS