Angerlarsimaannarallarnissamik malinninngitsut akiligassitsittalerput

Nalunaarut ataasinngormat atuutilersoq malillugu inuit nunatsinnut tikinnerminnit angerlarsimaannarallarnissamik malinninngitsut akiligassinneqarsinnaalerput.

Peqqissutsimut naalakkersuisoqarfik taama nalunaaruteqarpoq.

Nunatta avammut ammariartuaarnerani immikkoortoq siullermi angalasut piumasaqaatinik assigiinngitsunik naammassinneqqaarlutik nunatsinnut tikissinnaapput. Angalasoq covid-19-imut misissortinnermini napparsimanngitsoq paasineqarsimassaaq uppernarsaateqarlunilu. Misissortinneq aallannginnermi ullut marluk sioqqullugit, siusinnerpaamillu ullut tallimat sioqqullugit pisimassaaq. Angalasoq aallannginnermini Sumut immersorsimassavaa, angalanerup sumut killinnera ilisimatissimassallugu.

Tikinnermi inerteqqutit

Angalasoq Kalaallit Nunaannut tikinnermini assigiinngitsunik inerteqquteqarfigineqarpoq. Taakku pillugit peqqissutsimut naalakkersuisoqarfik nittartakkami paasissutissanik saqqummiussivoq.

Covid-19-ip nunatsinni tunillaassulinnginnissaa pissutigalugu inerteqquteqartoqarpoq. Covid-19 qaammatialuinnarni nunarsuarmi tamarmi tunillaassorpoq, nunarsuullu aningaasaqarnera ajalusoortilluinnalerlugu.

Uku maanna atuupput:

• Kalaallit Nunaannut timmisartumik tikinnermik kingorna angerlarsimaannassapput, inunnik allanik peqateqarnatik. Angerlarsimafimmi inuit tassani pineqanngillat.
• Privatimik pisortatigoortumillu katerisimaarnernut, aaqqissuussinernut, pisunut il.il. peqataaneq inerteqqutaavoq.
• Inini inuussutissarsiortut inaataannut inuillu iserfigisinnaasaat, ilaatigut cafiit, neriniartarfiit aamma imerniartarfiit il.il. isersimaffigeqqusaanngillat.
• Taamaattoorli allanik isumagineqarsinnaanngippata pisariaqarnerpaanik niuerniartoqarsinnaavoq.
• Taassuma saniatigut pisortat aamma namminersorlutik ingerlataqartut utoqqaat Illuutaannut napparsimmavinnullu isersimasoqaqqusaanngilaq.

Malittarisassat angalasimasup covid-19-imik napparsimannginnerminut takussutissamik peqalernissaata tungaanut atuuttut, peqqissutsimut naalakkersuisoqarfik ilisimatitsivoq:

• Kalaallit Nunaannut tikinnermiit ullut 5-t qaangiunneranni misissorteqqittoqartarnissaa periarfissaavoq. Misissortinnermi covid-19-imik nappaateqanngikkaanni taava angerlarsimaannaqqusaaneq atorunnaassaaq.
• Innuttaasoq misissorteqqinngippat taava innuttaasoq Kalaallit Nunaannut tikinnermi kingorna ulluni 14-ini inerteqqutit atuutissapput. Innuttaasoq Kalaallit Nunaannut ullut 14-it kingorna nappaammik ersiuteqanngikkuni, inerteqqutit atorunnaassapput.