Angerlarsimaannaqqusaanermik malinninngitsut soraarsitaasut
Nuummi suliffeqarfiup sulisuni sisamat tikinnerup kingorna angerlarsimaannarallarnissamik maleruaqqusanik malinnissimanngimmata soraarsippai. Angutit sisamat pineqartut tamarmik politiinit 6000 koruuninik aamma akiligassinneqarput.
Angutit sisamat 20-t 24-llu akornanni ukioqartut nunatsinnut tikinnerminnit angerlarsimaannarallarnissamik malinnissimanngitsutut Kalaallit Nunaata Politiivinit unnerluutigineqarput.
Tamarmik immikkut 6000 koruuninik akiligassinneqarput, aammali sulisitsisuminnit MT Højgaardimit soraarsinneqarlutik, taamatullu sulilernermut atatillugu angalatinneqarnermut aningaasartuutinik taarsiisussanngortinneqarlutik.
- Danmarkimiit februarip aallartinnerani tikinnerminni Kalaallit Nunaannut angalanermut nalunaarummik marloriarlutik unioqqutitsisutut unnerluutigineqarput. Kalaallit Nunaannut tikinnerminni ullormi tassani qanermut kiinnamulluunniit assiaquteqaratik niuertarfimmiissimapput, alla aamma Kongevejimiittumi Fitness GL-imi timigissarsimalluni, Kalaallit Nunaata Politiivinit tusagassiorfinnut nalunaarutigineqarpoq.
Pisut tamarmik tikittut sisamat Covid-19-imut misissortitsinnagit pisimapput.
Angutit sisamat nalunaarummik marloriarlutik unioqqutitsisimasutut tamarmik immikkut 6000 koruuninik akiligassinneqarput.
Suliffeqarfiit paasiniaanermi ikiuupput
Nuummi suliffeqarfiit politiit paasiniaaneranni ikiuupput, videoliuutini immiussat tunniullugit tunillaassortoqarsimasinnaaneranilu paasiniaanermi ikiuullutik.
- Ajunngilluinnarpoq suliffeqarfiit akisussaffimmik tigusillutik politiit sulineranni ikiuussinnaammata. Aamma eqqaaneqartariaqarpoq nunatsinnut tikittut amerlanerpaartaasa Covid-19-imut tunngatillugu killilersuutinik malinnittarmata. Suliap ima ittup erseqqissaasariaqartugut takuteqqiinnarpaa angerlarsimaannarnissamik piumasaqaatinik malinninnissap qanoq pingaaruteqartigineranik.
- Covid-19-imut sakkorisarput pingaarneq suli taannaavoq Kalaallit Nunaat tunillaassortoqarnerani ingalassimatinniassallugu, taamatullu tunillaassuunnerup nunatsinnut tikinnginnissaanik suliniuteqarneq, politimester Bjørn Tegner Bay oqarpoq.
Tunillaassortoqarsinnaaneranut tunngatillugu qulakkeerinnikkumallutik misissortissimasut aappassaaneerlugit misissorneqarsimapput. Angutit pineqartut tamarmik tunillatsissimanngitsut paasineqarpoq, taamaammallu politiit suliami annerusumik iliuuseqassanngillat.