24. juni Islandimi politiit sineriammi nakkutilliisut suleqatigalugit inuit pingasut angallammi tingerlaataannalimmi inuttaasut tigusaraat, politiit oqarnerat naapertorlugu taakku Danmarkimit Kalaallit Nunaannut angalapput.

Tassami politiit hashimik annertuumik angallammi nassaarput. Politiit siornatigut hashi qanoq annertutigisoq nassaarineqarsimanersoq misissuineq pissutigalugu oqaluttuarusussimanngillat.

Nunatsinnut tunngatillugu hashimik nassaarnerit annersarigaa, Islandimi politiinit paasissutissat nutaat uppernarsarpaat.

Politiimmi angallammi hashimik 160 kiilut ataatilaarlugit oqimaassusilimmik nassaarput. Misissuinermi aqutsisoq, Grímur Grímsson, Sermitsiaq.AG-mut ilisimatitsivoq.

- Nassiussat Kalaallit Nunaannut nassiunneqartut isumaqarpugut, Danmarkimi Kalaallit Nunaannilu politiit suleqatigillualereerpagut.

Suliami pingasut pasineqartut

Islandimi Politiit tassunga atatillugu inuit pingasut tigusaraat, taakkunannga marluk kalaaliupput, kingullerlu qallunaajuvoq.

Inuit siullermik 1. august tungaanut tigummigallarneqarput, ikiaroornartunik eqqussisutut pasineqarput, tigummigallarneqarneralli 29. august tungaanut sivitsorneqarpoq.

Islandimi pinerluttulerinermi inatsit malillugu inatsimmik taamaattumik unioqqutitsineq annerpaamik ukiunik 12-nik parnaarussaanermik pineqaatissiissutaasarpoq.

Hashi 160 kiilut missaannik oqimaassusilik Sermitsiaq.AG-p paasissutissaatai naapertorlugit, Kalaallit Nunaanni 130 millionit koruunit missaanni naleqarpoq.

Maannamut nassaarineqartut annersaat 2009-imi nassaarineqarpoq, tassani hashi 118 kiilu tingerlaataannalimmi Qaqortup kujataani nassaarineqarpoq. Hashi ilaatigut puiaasanik naqitsivinni arfinilinni 13 kiilukkaartut nassaarineqarput.