Angallat Hollandimeersoq politiit ujaaraat
Angallat angummik hollandimiumik ilaasoqartoq politiinit ujaarineqarpoq. Angut ilaquttaminut kingullermik attaveqarpoq 8. august 2021. Pilersaarutit malillugit Kalaallit Nunaannut 22. august tikittussaagaluarpoq, sulili attavissaanani.
Angallat hollandimeersoq LAUREL-imik atserneqarsimasoq, angummik ilaasoqartoq Kalaallit Nunaata Politiivisa ujaaraat.
Politiit taama tusagassiorfinnut nalunaaruteqarput.
Angut Hollandimeersoq kingullermik ilaquttaminut attaveqarpoq 8. august ilisimatitsilluni Islandimiit Kalaallit Nunaannut aallarluni, naatsorsuutigalugulu Kalaallit Nunaannut tikissalluni 22. august. Ilaqutaasa 8. augustili attaveqarfigigamikku suli tusarfigeqqissimanngilaat.
- Ilaquttani ilisimatissimavai Kalaallit Nunaata tungaanut tikiffissaminut siullermut 180 sømil angallavigissallugit. Taamaammat naatsorsorneqarsinnaavoq Kujataanut angalasimasoq, politiit tusagassiorfinnut nalunaaruteqarlutik ilisimatitsipput.
Arktisk Kommando ujaasivoq
Arktisk Kommando angallammik ullumi ujaasilerpoq. Imartallu angallatip sumiiffigisinnaasai ullumi qulaavaallugit.
- Kalaallit Nunaata Politiivisa imartatsinni angalasut tamarmik angallammik LAUREL-imik atserneqarsimasumik takunneratarnissaminnut eqqummaareqqullugit qinnuigai. Angallat qisummik taartumit sanaajuvoq. Pingaartumik Kalaallit Nunaata kujataani nakkutiginnittoqaqqusisoq, Kalaallit Nunaata Politiivi allapput.
Innuttaasut angallammik takunnittut Kalaallit Nunaata Politiivinut sianeqquneqarput uunga 701448.