Angallassineq pillugu isumaqatigiissutissat ataatsimiititaliamut nassiunneqarsimasut
Naalakkersuisut ilaasunik angallassineq pillugu kiffartuussinissamik isumaqatigiissutissat isumaqatiginninniutigalugit naammassisimavaat, innuttaasulli ukiortaareerpat angalanissaminnut inniminniinissaq suli utaqqilaartariaqarpaat.
Nunami maani decembarip 31-ata kingorna angallassinermi pissutsit qanoq isssanersut innuttaasunut suli nalorninarput, kiffartuussinissamummi isumaqatigiissutit maanna atuuttut ullormi pineqartumi atorunnaartussaapput.
Suliamili siuariartoqarsimasoq, Naalakkersuisut nalunaarutigaat.
Naalakkersuisut isumaqatigiissutissanut missingiut sisamanngormat akuerisimavaat, missingiullu Inatsisartut Aningaasaqarnermut Akileraartarnermullu Ataatsimiititaliaani maanna suliarineqartussanngorpoq.
Ataatsimiititaliap isumaqatigiissutissat akuerissappagit, 2021-mi angalanissanut bilitsisisoqarsinnaalissasoq, Naalakkersuisut allapput.
Corona pissutigalugu kinguaattoorsimasut
Naalakkersuisut naapertorlugit isumaqatigiissutit nutaat malitsigisaannik bilitsinik inniminniisarneq ajornannginnerulissaaq, atortut nutaajunerulissapput atuilluartoqarnerulissallunilu.
Inatsisartut Sanaartornermut Ataatsimiititaliaani siulittaasup Justus Hansenip ilaasunik angallassisarnermi kiffartuussinissamut suli isumaqatigiissusiorsimannginnera assuarnartoqartissimavaa, takornariartitsisartunut sullitaminnut neqeroorutissanik suliaqarsinnaasimanngitsut ilaatigut ajoqutaasussaammat.
Naalakkersuisut nalunaaruteqarnerminni nassuiaatigaa, isumaqatigiissutissanut tunngatillugu isumaqatiginninniarnerit coronap ajornartorsiortitsinera pissutigalugu kinguaattoorfiusimasut.
Kommunit peqataatinneqarsimasut
Angallataatillip ataatsip aamma ingerlatsineq isornartorsiorsimavaa, tupigusuutiginerarlugulu kiffartuussinissamut isumaqatigiissutissani nutaani atugassarititaasut pillugit politikkikkut oqallittoqarnerusimannginnera, kingullermimmi isumaqatigiissutaasimasut innuttaasunit politikkerinillu annertuumik isornartorsiorneqarsimammata.
Soqutigisaqaqatigiilli assigiinngitsut ilaatinneqareersut, Naalakkersuisut nassuiaatigaat:
- Ilaatigut kommuninut innuttaasumi pisariaqartitaannik kissaataannillu ilisimaarinninnerusunut angallanneq pillugu isumasioqatigiissitsinikkut kiisalu Inatsisartunut assinganik isumasioqatigiissitsinikkut peqataatitsisoqarpoq.
- Isumaqatigiissutissanut kommunit kissaataat Inatsisartut Sanaartornermut Ataatsimiititaliaanut aamma saqqummiunneqarput. Kissaatit saqqummiunneqarnissaanut partiit siulittaasui tamarmik aamma aggersarneqarnikuupput, upernaarlu manna nunatsinni borgmesterit tamakkerlugit ataatsimeeqatigineqarlutik, Naalakkersuisut allapput.