Angallanneq
Angallannikkut paatsiveerusimaarneq
Disko Linep Qeqertarsuup Tunuani kiffartuussinissamut isumaqatigiissutaata atoqqaartinneqarnera aallartinnerliorpoq. Ilaasut decembarip maannalu aamma ukiortaap kingorna kinguaattoornerit arlallit pereersullu qaqugu angalasinnaalernissartik ilisimanngilaat
»Angallannikkut aaqqissuussaaneq eqaatsoq aningaasaqarneq ilaasuvullu pingaartillugit ineriartortinneqassaaq«, Disko Line nittartakkamini allappoq.
Ilaasulli angalatitseqatigiiffik Qeqertarsuup Tunuani Kujataani ilaasunik angallassinermi kiffartuussinissamut kisumaqatigiissummik tigumminnittunngortoq tamatumani isumaqatiginngilaat. Pingaartumik angallassinissamut pilersaarutit allannguutaat pillugit paasissutissanik amigaateqarneq Qeqertarsuarmut Qeqertarsuarmiillu angalasunit kinguaattoornerit taamaatitsiinnarnernillu arlalissuit pereersullugu isornartorsiorneqarput.
Nuummeersoq Alice Møller, Qeqertarsuarmit kingoqqisuusoq, panini peqtigalugu angajoqqaamini juullisiorpoq. Januaarip tallimaani aallartussaasimagaluarput ataasinngornermilu ullup qeqqata siornatigut qaqugu aallarsinnaalernissaminnik suli ilisimatinneqarsimanani.
- Pisoq kipiluttunartorujussuuvoq. Qeqertarsuarmut Qeqertarsuarmiillu timmisartukkut attaveqaatit pillugit angalatitsiviup angallanneq pillugu paasissutissiissutaani nutarterisoqanngilaq, aamma sms-ikkut nalunaarfigineqartanngilagut, oqarasuaatitta normui angalatitsivimmit pigineqaraluartut. Angajoqqaakka internetteqanngillat, taamaattumik oqarasuaatinni angallattakkami mobildata atorlugu paasissutissanik ujaasisarpunga kisiannili annertunerusumik pissarsissananga, Alice Møller oqarpoq.
Nuummi ataasinngornermi pingaarutilimmik suliassaqaraluarpoq panialu sapaatip-akunnerani kingullermi atualersussaagaluarluni.
Kipiluttusut
Qeqertarsuarmi najugalik Timooq Mølgaard aamma kipiluttunartumik inissisimaffeqarpoq. Qatanngutaa ukiortaaq sioqqutitsiarlugu kemortikkiartorluni aallartussaasimagaluarpoq. Ilaqutariinnilo toqusoqarneratigut Nuuliarnissaralua kinguartittariaqarsimalluni.
- Januaarip tallimaani aallartussaasimagaluarpoq, maannali ullut arlallit qaangiunneranni angalanissaanut pilersaarummik nutaamik suli tusagaqarsimanata. Inuit inuunermut aarlerinaatilimmik kræftitut ittumik nappaateqartut angallannikkut ajornartorsiutit pissutigalugu pingaarutilerujussuarmik nakorsarneqarnissaraluata kinguartinneqarnera qaqugulu aallarsinnaanerminnik ilisimatinneqannginnerat toqqissisimananngilluinnarpoq, Timooq Mølgaard oqarpoq.
Qeqertarsuaq illoqarfiarannguuvoq, kikkullu tamangajammik allat qanoq pinerannik malittarinnittarlutik. Timooq Mølgaard ilaatigut inunnik timmisartup tullissaata qaqugu tikissanersup ilisimanngisamik tikinnissaanut utaqqisinnaajunnaarnertik pissutigalugu aalisariutinut ilaallutik Ilulissiarsimasunik Aasiannukarsimasunilluunniit nalunngisaqarpoq.
Disko Linep pisortaa Frederik Sandgreen Alice Møllerimik aamma oqaloqateqarsimavoq, taassumali naammagittaalliutaanik paasiuminaatsitsilluni.
- Ilaasut oqarasuaatimik angallattakkat normuinik eqqortunik tunniussisarnissaat pingaartorujussuuvoq, paasissutissanik ingerlatitseqqiisinnaaniassagatta.
- Aamma ilaasuvut kaammattorusuppakka nittartagarput misissuataaqqallugu angallassinermut aalajagersakkat ataanni, tassani kinguaattoortoqartillugu suleriaasissaq allaaserineqarmat, Frederik Sandgreen, piffissami matumani ilaasunit paatsiveerusimaartunit kinguaattoornermillu eqqugaasimasunit sianerfigineqaqattaartuartoq, oqarpoq.
Suliaq pillugu AG-mi atuaqqigit: