Angallannermut ministerip kalaallit app-ikkut biilersinnaanermut allagartaqarsinnaanerat ammaffigigaa

Danmarkimi naalakkersuisut digitaliusumik biilersinnaanermut allagartaqarsinnaaneq eqqunniarpaat. Taama ittumik Kalaallit Nunaat peqalissappat, Naalakkersuisut suliniuteqartariaqarput.

Biilersinnaanermut allagartaq digitaliusoq Kalaallit Nunaanni imaaliallaannaq atuutilersinnaanngilaq. Atuutilissappammi Naalakkersuisut atuutilersikkumallu immikkut piumasaqaqqaartariaqarput.

Angallannermut ministerip Ole Birk Olesen (LA) Aaja Chemnitz Larsenimut (IA) danskit naalakkersuisuisa suliniutaat "Biilernermut digitalimik allagartaqarsinnaaneq" pillugu suliniutaanut apeqquteqataanut akissuteqaataani atuarneqarsinnaavoq.

Danskit naalakkersuisuisa biilernermut allagartaq digitalinngorsarumavaat, taamaaliornikkut allagartaq smartphonemi app-imit takutiinnarianngortissallugu.
Tamanna Kalaallit Nunaanni 2020 sioqqullugu atuutilernavianngitsoq, Ole Birk Olesen oqarpoq.


- Innuttaasut, Kalaallit Nunaanni najugaqartut, Kalaallit Nunaanni biilernermut allagartaqarsinnaanermut malittarisassat malillugit allagartaqaqqaarlutik biilinik ingerlatsisinnaapput. App-imik atuilluni biilernermut allagartanik digitalinngorsaaneq Kalaallit Nunaanni atuunnissaanik aaqqiisoqarnissamik eqqarsaasersortoqanngikkallarpoq, Ole Birk Olesen oqarpoq.

Periarfissaq ammatinneqarpoq


Kingusinnerusukkulli digitalinngorsaasoqassagaluarpat angallannermut ministerip itigartitsereernavianngilaq.

Kalaallit oqartussaasui apeqqut pillugu attaveqatigineqartut, Ole Birk Olesen ilisimatitsivoq.


- Angallannermut, sanaartornermut ineqarnermullu ministeeriaqarfiup Kalaallit Nunaanni biilernermut allagartat assigusumik digitaliusumik tunniunneqartalernissaannut ammatitsipput.

- Biilersinnaanermut allagartaqarnermut apeqqutinut tunngasut, Angallannermut, sanaartornermut ineqarnermullu ministeeriaqarfimmit kalaallit oqartussaasui attaveqarfigai ilaatigut Kommunenut, nunaqarfinnut, isorliunerusunut, angallannermut ineqarnermullu naalakkersuisoqarfik aammalu Kalaallit Nunaanni politiit.

17-inik ukioqarlutik biilernermut allagartaqalersut


Aaja Cheminitz Larsenip ilanngullugu paasiumavaa Kalaallit Nunaanni inuusuttut 17-inik ukiullit biilernermut allagartaqalersinnaanissaannut misiliutaasumik suliniuteqartoqassanersoq.

Illoqarfiup iluani angallannermut akisussaaffik Kalaallit Nunaata suli tigunikuunngilaa, taamaammat danskit taakkununnga oqartussaasuupput.

Apeqqummut tunngatillugu Angallannermut, sanaartornermut ineqarnermullu ministeeriaqarfiup misissuiffigissallugu ammaffigaa, inatsisitigut periarfissaqarnersoq, Naalakkersuisullu taamatut aaqqiisoqarnissaanik kissaateqarnersut, tassuuna misissuiffigissallugu, Ole Birk Olesen naggasiivoq.

Powered by Labrador CMS