Skip to main content

Angallannermut inatsit nutarternissaat sulissutigineqarput

Nunatsinni angallannermut inatsit nutarterneqarnissaa nukiginnarpoq. Nunarput Danmarkilu suleqatigiissitamik pilersitsisimapput, malittarisassat Nuummut nunaqarfinnullu minnernut tulluartuusinnaasut misissuiffigineqartussangorlugit.

Nunatsinni angallannermut inatsisip nutarterneqarnissaa pisariaqarpoq. Ineqarnermut attaveqaasersuutinullu Naalakkersuisoq Erik Jensen, S, taama isumaqarpoq. Taamaasilluni politit pisortaat Bjørmn Tegner Bay aamma folketingimi ilaasortaq Aaja Chemnitz Larsen, IA, isumaqatigai. 

- Danmarkimi angallannermut inatsisip nutarterneqartarnera assigalugu Kalaallit Nunaanni angallannermut inatsisip nutarterneqarneq ajornera, politimester Bjørn Tegner Bayituulli ernummatigivara. 

- Politimesterip oqariartuutai Naalakkersuisut tamakkiisumik tapersersorpaat. Angallannermut tunngatillugu ajornartorsiutit arlallit iluarsiiffigineqanngitsut takusinnaavakka, Erik Jensen Sermitsiaq.AG-mut allakkatigut akissuteqarluni ilisimatitsivoq.

LÆS OGSÅ: Inatsit nutaanngilisoq politimesterip isornartorsioraa: Folketingimi ilaasortaq tapersiivoq

Sermitsiaq.AG-p politimester Bjørn Tegner Bay aamma folketingimi ilaasortaq Aaja Chemnitz Larsenip angallannermut inatsisip nutarterneqarneq ajornera pillugu ernumaateqartut, sapaatit akunneri matuma siorna allaaseraa.

Aaja Chemnitz Larsen allaaserisami ilisimatitsivoq nunatsinni angallannermut inatsit immikkoortuni 14-ini nutarterneqarsimanngitsoq, naak Danmarkimi nutarterisoqareeraluartoq.

Suleqatigiissitaq misissuivoq

Ineqarnermut attaveqaasersuutinullu naalakkersuisoqarfik ilisimatitsivoq ukiuni tallimani kingullerni qamutit motoorillit 50 procentimik amerleriarsimasut. Angallannermullu inatsit nutartertariaqavimmat, nunatsinni naalakkersuisoqarfiup Danmarkimilu transportministeriaqarfiup suliat misissuiffigilersimavaat.

Nunarput Danmarkilu suleqatigiissitaqarput. Suleqatigiissitami naalakkersuisoqarfimmeersut Naalakkersuisut Inatsisartullu kissaataat saqqummiutissavaat, nunarpullu pillugu ilisimasanik tunniussissallutik. Transportministeriaqarfiup aaqqiissutissat, Nuummut nunaqarfinnullu minnernut tulluartut nassaarissagai, Naalakkersuisoq ilisimatitsivoq.

- Illoqarfinni annerusuni aqqusinertigut angallattut, sukkanerusumillu angallattut amerligaluttuinnarput, qamutillu motoorillit assigiinngitsut takussaaleqqallutik. Aqqusinertigut angallanneq ineriartorpoq, malittarisassallu angallannermut naleqqussarneqassallutik, Erik Jensen akissuteqarpoq. 

Augustimi ataatsimeeqatigiissasut

Misissukkat ilagaat biilinik uteqqiattumik misissuisarnissaq. Nunatsinni biilit danskit oqartussaasuinit kingullermik misissorneqarput 1999.

ATV-mik ingerlatsisinnaanermut allagartamut malittarisassat, qamuteralannillu ingerlatsisinnaanermut ukiut killigititaat Inatsisartut ukioq manna aalajangiiffigisimasaat aamma misissorneqartunut ilaapput. Kiisalu nunatsinni qamutit angissusissaat, akseliisa naqitsinerat, tamarmiusumillu oqimaassusaat pillugu nalunaarut 1975-imeersup nutarterneqarnissaa misissorneqarpoq.

- Suliat suliarineqarnissaat nukingernarpoq. Taamaattumik transportminister Trine Bramsen qanittumi ataatsimeeqatigissallugu Naalakkersuisutut pilersaarutigaara, ataatsimeeqataasussatullu politimester Bjørn Tegner Bay aggersarnikuuara. Taamalilluni suliat nukingernartutut suliarineqarnissaat, pisariaqanngitsumillu kinguarsarneqannginnissaat angorusuppara, Erik Jensen akissutimini ilisimatitsivoq.

Naalakkersuisoqarfik ilisimatitsivoq Naalakkersuisup, Transportministerip politimesterillu ataatsimeeqatigiinnissaat augustimi pisussatut pilersaarusiorneqartoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER