Greenland Express Air

Angallannermut aqutsisoqarfik Greenland Express Air pillugu utoqqatsissuteqarpoq

Angallannermut aqutsisoqarfik paasissutissanik kukkusunik tunniusisimanini aammalu Greenland Express Airip suleqatigisaata atianik paatsoortitsisimanini ’utoqqatsissutigaa’, tassani bulgariamiut timmisartortitseqatigiit pineqarput

Assi toqqorsivimmit

- Aap.

Angallannermut aqutsisoqarfiup allaffiata pisortaata aamma tusagassiorfinnut attaveqartartuata Britt Skovdal Rasmussenip apeqqummik ataatsimik ersarissumik emailikkut aperineqarami akissutaa taama ersaritsigaaq. Tassa Greenland Express Air timmisartuusseqqilerpat kikkut timmisartuussinissamut akuersissummik pisimanersut apeqqutigineqarmat.

Emailimi toortakkamik ingerlaqqiffissamik bosniamiut timmisartortitseqatigiivinut, tassa BH Airlinesimut ingerlatitseqqittussamik Angallannermut aqutsisoqarfimmi sulisup takusinnaasaanut emailimi tuugassamik ilanngussaqarpoq.

Angallannermut aqutsisoqarfimmi aqutsinermi suliallip akissuteqarnerata kingorna, BH Airlinesip allaffeqarfianut Sarajevomiittumut sianerluni paasiniaanernik malitseqarpoq. Suliffeqarfiup nittartagaani normu sianerfissaq allaqqasoq sulisunit akineqanngilaq. Taamaallaalli suliffeqarfiup tuniniaanermut immikkoortortaanut sianernermi akisoqarpoq. Taanna allaffimmut pingaarnermut innersuussivoq, tassanilu normumi akisoqanngilaq.

Atuaruk: Angallannermut aqutsisoqarfik: B & H Airlines pineqarpoq

Bosniamiut timmisartortitseqatigiiffianut sianerneq pisariaqarsimavoq, Greenland Express Airimi oqaaseqarsinnaasutuaq Gert Brask, Sermitsiaq.AG-mit saaffiginnissutinik piumannginnami. Aamma pingaartumik siornatigut kikkut timmisartuussisussaanersut siornatigut oqaatigineqarnikuunngimmata.

Atuaruk: Greenland Express ilumuunnginneraasoq

Angallannermut aqutsisoqarfik ersernerlunnerit utoqqatsissutigai
Tallimanngornermi Sermitsiaq.AG-p Angallannermut aqutsisoqarfiup paasissutissiinera naapertorlugu allaaserisaqarpoq, bosniamiut BH Airlines Greenland Express Airimut qaammatip uuma ingerlanerani timmisartuussileruni timmisartuussisuussasoq. Paasissutissiineq Gert Braskimut annertuumik qisuariartitsisoq, sapaatip akunnerata naanerani arlalinnik tusagassiuutinut nalunaarutinik nassiussineranik kinguneqartumik.

Suliffeqarfik sorleq Greenland Express Airimik timmisartuussissanersoq erseqqissumik paaserusullugu, Sermitsiaq.AG Angallannermut aqutsisoqarfimmut attaveqaqqippoq. Maanna paasititsissutigineqarpoq bulgarimiut BH Air - siullermik oqaatigineqartutut BH Airlinesiunani. Allatut oqaatigalugu bulgarimiut bosniamiuunngitsut, Gert Brask suliffeqarfiutaata isumaqatigiissuteqarfigai.

Allaffimmi pisortap Britt Skovdal Rasmussenip emailikkut Sermitsiaq.AG-mut paatsiveerutsitsineq utoqqatsissutigalugu allappoq:

- Suliami attaveqaqatigiinneq peqqutaalluni atermik paatsoortitsinermik kinguneqarnera utoqqatsissutigaara. BH Air Ltd. akuersissummik pissarsivoq. Taannalu suliffeqarfik bulgarimeerpoq.

Greenland Express Airip pisortaanera, Gert Brask, piffissami sivisuumi Sermitsiaq.AG-mit apersorneqarnissani kissaatiginngilaa.

Allaaserisat Greenland Express Airimut tunngasut uani atuakkit

Powered by Labrador CMS