Angallanneq pillugu killilersuutit ataasinngorpamut nuunneqarput
Nuummiit angallattunut killilersuutit ataasinngorpat atuuttussanngorlugit aaqqinneqarput. Tallimanngornermi ualikkut tusagassiortunik katersortitsisoqarnerani ilisimatitsissutigineqaraluarpoq killilersuutit unnuap qeqqaniit atuutilissasut.
Nuummiit angallattunut killilersuutit pillugit ualimut tusagassiortunik katersortitsinermi nalunaartoqareersorlu, Nuummiit aqagu aallartussat ernumasut arlallit politiinut siarngussimapput.
Corona pillugu sulisoqatigiit Sermitsiaq.AG-mut taama ilisimatitsipput.
Killilersuutit nutaat malillugit Nuummiit angalasussat akiuussusersimasussaapput, coronavirusimillu tunillatsissimannginnermut uppernarsaammik 48 tiiminit nutaannginnerunngitsumik takutitsisinnaasariaqarlutik.
Tamannali aqagu aallartussanut unammillernartoqangaatsiassaaq, aallannginnermimi misissortereernissamut piffissaarukkamik.
Oqartussat maanna allannguipput, nalunaarlutillu angallannermut tunngatillugu killilersuutit arfininngornermi atuutsilernagit, ataasinngornermi aatsaat atuutsilissallugit.
Oqartussat ilanngullugu innuttaasunut kaammattuipput killilersuutit pillugit apeqqutissaqarunik politiinut sianeqattaaqqunagit, politiinik ikiorneqarnissamik pisariaqartitsisut sianerniarlutik attaveqarneq ajuleratarsinnaanerat pillugu.