Angallammik ujaasineq unitsinneqartoq

Islandimi annaassiniartartut Issittumilu Sakkutooqarfik angallammik tissiartaammik Hollandimeersumik, aggustimi Kujataanut tikittussaagaluamik ujaasinerminnik unitsitsisimapput.

Angallat tissiartaat hollandimiumik inuttalik, ilaqutaasa aggustip arfineq-pingajuanili tusarfigeqqissimanngisaat, aggustip naalerneranili ujarneqalerpoq.

Maanna Hollandimi, Islandimi Kalaallillu Nunaanni upalungaarsimasut sapaatip akunnerini arlalinni ujaasinerigaluartik unitsippaat, Issittumi Sakkutooqarfik ilisimatitsivoq.

Issittumi Sakkutooqarfimmi sulisup oqaluttuaraa, Islandimi annaassiniartartut, Kalaallit Nunaanni Politiit Aasiaat Radioatalu inuit angallammik pineqartumik takusaqassagunik nalunaaruteqarnissaannik kaammattuisoqarsimagaluartoq, ataasiaannarluniluunniit nalunaaruteqartoqarsimanngilaq.

Angut Hollandimeersoq pilersaarutit malillugit aggustip 22-ani Kalaallit Nunaannut tikittussaasimagaluarpoq.

Issittumi Sakkutooqarfiup umiarsuaq alapernaarsuut, qulimiguulik timmisartorlu Challengeri atorlugit Kujataata imartaani angallat ujaarisimavaa. Angallat tissiartaat taamaalilluni aggustip arfineq-pingajuani Vestmannamiit aallarmalli takuneqaqqissimanngilaq.

Powered by Labrador CMS