Angallammik angallassisartoq: Kiffartuussinissamut isumaqatigiissutit suliarinnittussarsiuunneqartariaqaraluarput
Namminersorlutik Oqartussat ingerlatseqatigiiffiit allat ilaasunik angallassinermi kiffartuussinissamut isumaqatigiissutinut neqerooruteqarsinnaatinnagit Disko Linemut pituttorniarsarisut, angallammik angallassisartup Ilulissaneersup ernummatigaa.
Claus E. Jepsen Ilulissani Boat Charterimik ingerlatsisuuvoq, piffissamilu kingullermi politikkerinut sapinngisaminik eqeersaaniarsarisimagaluarpoq.
Taannami isumaqarpoq, ilaasunik angallassisarnermi kiffartuussinissamut isumaqatigiissutissat nutaat ukiortaamiit atuutilersussat pillugit isumaqatiginninniarnermi kukkorujussuartoqalersoq.
Naalakkersuisut ukiortaareerpat isumaqatigiissutissat taamalu kiffartuussinissamut isumaqatigiissuteqarfiusuni angallassisarnissat qanoq isikkoqassanersut suli saqqummiutinngilaat, Naalakkersuisulli Karl Frederik Danielsenip oqaatiginikuuaa, ukiunut qulinut atuuttussanik isumaqatigiissuteqarnissaq anguniarneqartoq.
Naalakkersuisut piffissamut taamak sivisutigisumut isumaqatigiissuteqarniarnerat tunngavigalugu, Claus E. Jepsenip suliariumannittussarsiuussisoqarsimannginnera ernummatigaa.
- Oqallisigineqarsimasariaqaraluarpoq
- Qanoq iliorsinnaanerput pillugu angallassisartunut allanut arlaannilluunniit nalunaaruteqartoqarsimanngilaq.
- Isumaqatigiissut kisimiillunga naammassisinnaanngilara, marlunnilli targaateqarpunga, isumaqarpungalu angalassisarnerit taakku qanoq ingerlanneqarlutillu isumagineqartarnissaat oqallisigineqarsimasariaqaraluartoq. Najukkani angallassisartuaqqat aamma immaqa neqerooruteqarsinnaagaluarput, Claus E. Jepsen oqarpoq.
Taassuma erseqqissaatigaa, Disko Line suliassamik naammassinninnissamut pitsaanerpaallunilu akikinnerpaappat, isumaqatigiissummik pissarsinissaa ajunngivissoq.
Claus E. Jepsenili isumqarpoq, Naalakkersuisut Disko Linemik taamaallaat isumaqatiginninniarnissamik aalajangersimanerat taamalu ingerlatseqatigiiffinnik allanik avaqqutaarinerat suliffeqarfinnut allanut naapertuilluannginnerusoq.
Politikkerinut eqeersaasoq
Angallammik angallassisartoq aamma politikkerinut eqeersaavoq, isumaqarami kiffartuussinissamut isumaqatigiissutissat nutaat oqallisigineqannginnerat eqqumiittoq.
- Assersuutigalugu eqqarsaatigineqarsimanerpa, ingerlaarfissanik allanik isumaqatigiissuteqartoqarsinnaanersoq? Arlaannaalluunniit taamatut apeqquteqarnikuunngilaq.
- Soqutiginnittoqannginnera politikkikkut sumiginnaaneruvoq. Kia akisussaaffigaa, isumaqatigiissutip qaammatit pingasut affaasa qaangiuneranni atorunnaarnissaa, aamma arlaannaataluunniit ilisimasaqannginnerat, Claus E. Jepsen aperivoq.
Sermitsiaq.AG-p attaveqaatinut naalakkersuisoq Karl Frederik Danielsen (S) suliamut tunngatillugu oqaaseqartinniarsarigaluarpaa, maannamulli suli iluatsitsinani.