Angalatitsiviit: Nuuk Nunatta isaariarilersinnaavaa

Sapaatip-akunnerini makkunani kommunit aamma najukkami inuussutissarsiortut peqatigiiffiinit najukkaminni sooq mittarfik pingaaruteqarnersoq tunngavilersuisoqarpoq.

Maanna aamma Sermersooq Business Council (SBC) oqallinnermut ilannguppoq, tassani nunani tamalaani angalatitsivippassuarnik tunuliaqutserlutik.

SBC-ip angalatitsisartut aamma angalatitsiviit assigiinngitsut 60-t oqaloqatigisimavaat, peqatigiiffiullu nalunaarutaa naapertorlugu Nunatsinnut angalanernik amerlanerusunik tunisinissamut Nuummi nunanut tamalaanut mittarfimmik innersuussipput.

- Angalatitsisartut taakkua nunarsuarmi aamma Kalaallit Nunaanni ornigassarpassuit tikeraartarpaat. Unneqqarissumik siunnersorpaatigut: Kalaallit Nunaata sinneranut Nuuk iserfissatut atorsiuk, Stine Selmer Andersen, SBC-imi takornariartitsisarnermut inuussutissarsiornermi siunnersorti nassuiaavoq.

Kulturikkut immikkoortoqarfiit pingaaruteqartut

Nunatsinnut angalanermi angalatitsiviit Nuuk aallartiffittut innersuutigigaangamikkut, tamanna illoqarfiit pingaarnersaattut atuuffia pineqarpoq.

- Nuummi kulturikkut takusassaqarfiit ilaatigut Nunatsinni tikeraarnermi aallartiffissatut eqqortuuneranik isumaqartoq, angalatitsiviit oqarfigaatigut. Tamatuma takornarissat nunamik ilisarititsiffigisinnaavai.

Ilaatigut Nunatta Katersugaasivia, Nuummi Eqqumiitsuliornermut Katersugaasivik aamma Katuaq takornarissanut nunatsinni siullermik takutitsisinnaapput.

- Tamatuma saniatigut Nuuk pinngortitami misigisassaqarpoq, soorlu arfernik takornariarneq aamma pisuttuarnerit angalaarnerillu, taamaalilluni tamaasa pisinnaallugit.

Angalaffissanut amerlanerusunut tunisissasut

Angalatitsiviit Nunatsinni angalaffissanut amerlanerusunut Nuuk atorusuppaat.

- Kalaallit Nunaanni angalaqqinnissamut Nuuk pitsaasumik inissisimasoq taakku oqaluttuarput.

- Kalaallit Nunaatami nunap immikkoortuisa assigiinnginnerujussuat nukittoqqutigigaa taakku isumaqarput. Nuummi nunanut tamalaanut mittarfittaarutta, Kalaallit Nunaat allatut ammassaaq, tamannalu nunap tamarmi iluaqutigissavaa – takornarissat amerlanerusut sumiiffimmi ataasiinnaanngitsumi aningaasaliinerat pissutigalugu, Stine Selmer Andersen oqarpoq.