Angalatitsisarfik: Kalaallit Nunaat tunisaaffiunerpaavoq

Danmarkimi angalatitsisarfiit annersaasa ilaat nalunaarpoq, Kalaallit Nunaannut angalanissamik tuniniaasanermut atatillugu qaqutigoortumik siuariarujussuarsimasoq

Profil Rejserip Kalaallit Nunaannut angalanissamik tuniniaasarnera 2019-imi 57 procentimik siuariarsimavoq, 12 millioner koruuninillu kaaviiaartitsisimalluni, qarasaasiatigut atugassiaq standby.dk allappoq.

- 2019-imi siuariartoqangaatsiaraluartoq, 2019-imut sanilliullugu ukioq manna januaarip qaammataani 35 procent angullugu tunisaqarnerusimavugut, taamaalilluni Kalaallit Nunaat 2020-mi angalaffiunerpaat allattorsimaffianni siuttunngorluni, Profil Rejserimi pisortaaneq Peter Rasmussen standby.dk-mut ilisimatitsivoq.

Tusagassiorfitsigut sammineqarnerulersoq

Siuariarsimanermut nassuiaatigaa, Kalaallit Nunaata tusagassiorfitsigut sammineqarnerulersimanera. Silap pissusaata allanngoriartornera, Trumpip pisiaqarusussimanera Kalaallillu Nunaata isumannaallisaanermi politikkimut atatillugu qitiusumik inissisimanera Kalaallit Nunaata oqaluuserineqarneranut qulakkeerinnittuusut, pisortaq angalanermi akit naammaginarnerulersimanerannik aamma oqartoq isumaqarpoq.

- Kalaallit Nunaannut angalasarnerit assigiinngitsorpassuupput – 8.000 koruunit nalingannut inuk ataaseq sivisunerusumik weekendersinnaavoq, ilaatigut qulimiguulimmik qimussimillu takuniaasarnerpassuit 100.000 koruunit angullugit akeqarsinnaasarput. Kalaallit Nunaannut ataatsimoortumik angalatitsisarnitta amerlanersaat 25.000 koruuniniit 30.000 koruuninut inummut ataatsimut akeqartarput, Peter Rasmussen ilisimatitsivoq.

Powered by Labrador CMS