Angalasut kujataani aallaqqinneq ajulersut

Disko Line aqqutigalugu Narsarsuarmut 6. januar angalasussat katillugit 14-it apuuffissaminnut tikinneq ajuleqqapput. Timmisartukkut angalaffissat siulliit 16. januarioreerpat aatsaat pissasut, Disko Line ilisimatitsivoq.

Disko Line, Najaaraq Ittuk

Angalasut katillugit 14-it Disko Line aqqutigalugu Narsarsuarmut 6. januar angalasussaagaluartut, kujataani aallarneq ajuleqqapput.

Angalasoq kinaassutsiminik isertuussisoq Sermitsiaq.AG-mut ilisimatitsivoq ilinniarnermini misilitsiffissani angumerinngitsoortussanngorlugit, angalanerup kinguaattoorujussuarnera pissutigalugu.

- Københavnimut angerlartussaagaluarpunga 6. januar, misilitsinnissakka angumeriniarlugit. Ullorli taanna Disko Linep angallassinissani taamaatippai, Kæbenhavnimullu aallanngitsoorpunga. Disko Line pisussaagaluarpoq angalanissat nutaamik pilersaarusiussallugit, Air Greenlandilli billetsinik tuniniaanini unitsikkallarsimammagu suli taamaasiorsimanngillat, angalasoq kinaassutsiminik isertuussisoq Sermitsiaq.AG-mut oqaluttuarpoq.

Sermitsiaq.AG-p angalasup kinaanera ilisimavaa, angalanissaanullu pilersaarutaasimagaluartut pillugit uppernarsaatinik pissarsisimalluni.

Ullut qulit sinnerlugit kinguaattoorneq

Disko Linep uppernarsarpaa angallassinissaagaluaq 6. januar taamaatinneqarmat angalasut 14-it eqorneqartut. Angalasut sisamat maanna apuuffissaminnut apuunneqarsimapput.

Disko Line ilisimatitsivoq angalasut sinneruttut qulit 16. januar 2022-oreerpat apuuffissaannut angalatinneqarumaartut. Ullunut angalaffiusinnaasunut siullerpaanut billetsissaannik isumagineqarsimapput.

Air Greenlandip silaannakkut angallassinermut billetsinik tuniniaajunnaarnera angalatitsiniarnermut ilungersunartorsiortitsivoq.

- Ajoraluartumik angalasugut salliunneqarsimanngillat, Disko Linellu angalasut aallarfissai ajoraluartumik siuartissinnaanagit. Maanna angalasugut 16. januarioreerpat aallartussanngorlugit billetsisissuppagut, aallarfissalli siuartinniartaraluarlugit suli iluatsitsinata, Disko Linemi pisortaq, Noëlle Simoud Sermitsiaq.AG-mut oqarpoq.

Powered by Labrador CMS