Nuuk pingasunngornermi nal. 13.00 missaaniik anorersualerpoq.

Tamanna isumaqarpoq Air Greenlandip timmisartuutai nunamiiginnarallassasut, kitaanilu angallanneq kinguaattoorfiulersoq.

Angalasut 500-t missaanniittut ilisimatinneqarput Nuummi anorlernera pissutigalugu angalanissaat kinguartinneqartariaqartoq. Air Greenlandip angallassinissat nutaat suli suliarai, ilaasussallu angalanissamut pilersaarummik nutaamik piaartumik tunineqarumaarput.

Asiaq naapertorlugu Nuummi nal. 13.00 21,2 m/s-imik anoraasuartarpoq. DMI-lu naapertorlugu anoraasuartarnerit pingasunngornerup unnukkuani 30 m/s-iussangatinneqarput, sisamanngornermilu nal. 16.00 missaani qatsoriartuleqqissalluni.

Anori ersarlussinnaaneralu pissutaasut

- Anorip qanoq innera kisimi pissutaanngilaq, aammali erseqqarlussinnaanera pissutaaqataasarpoq timmisartuussisinnaajunnaartoqarnerani.

- Silamik ilimasaarut Nuummi ullumi eqquuppoq. Ualinerani anori sakkortunerulertussaavoq, Air Greenlandimi attaveqatigiinnermik immikkoortortaqarfimmi suliaqartoq, Katja Vahl Sermitsiaq.AG-mut ilisimatitsivoq.

Air Greenlandip naatsorsuutigaa angallassinerit arfininngorpat nalinginnaasumik ingerlaqqilissasut, silap qanoq ikkumaarnera apeqqutaalluni.

Tuukkamut kingoraartissat amigaatigineqartut

Air Greenland ilanngullugu ilisimatitsivoq Tuukkaq Kastrupimi ajutooreernermi kingorna suli angalasinnaanngikkallartoq.

- Kingoraartissaq amigaatigineqartoq nioqqutigineqanngilaq, taamaammallu Airbusimik sanaartorfiusoq toqqaannartumik attaveqarfigineqarpoq. Airbus attaveqarfigaarput kingoraartissamik pissarsiniarneq pillugu, tamassumalu iluatsinnissaa tikitserlugu timmisartorsuaq alla Københavnip Kangerlussuullu akornanni angalatitsissaaq, Katja Vahl ilisimatitsivoq.

A330-900neo Air Belgiumimeersoq Kangerlussuup Københavnillu akornanni 3. juni tungaanuugallartoq angallassisussatut attartorneqarpoq.