Angalanermi akiuussutissalerneqarsimanissamut piumasaqaat qasukkaaffigineqarpoq
Oqartussat ataasinngormat piumasaqaatigilerpaat, akiuussutissalertissimasut kisimik kikkut tamarmik ilaaffigisinnaasaannik atuisinnaasut. Piumasaqaat taanna tallimanngorneq juulip 23-at ilanngullugu atuuttussanngortinneqarpoq, siullertullu piumasaqaataasimasutut qaammatip naanissaata tungaanut atuuttussaatikkunnaarneqarpoq.
Nuummi misissortissimasut 826-usut arlaannaalluunniit coronamik tunillatsissimanngilaq.
Nutaarsiassatsialak taanna Naalakkersuisut Siulittaasuata Múte B. Egedep, Kiista Fenckerip Nunatsinnilu Nakorsaaneqarfimmeersup Paneeraq Noahsenip pingasunngornermi ualikkut tusagassiortunik katersortitsineranni saqqummiunneqarpoq.
Tuniluunnerup ajunngitsup tungaanut ingerlanerata malitsigisaanik, tassa ippassaq coronaqartut 30-usimariarlutik maanna 25-nngorsimaneranni aalajangiunneqarsimavoq, akiuussutissalertissimasut kisimik kikkut tamarmik ilaaffigisinnaasaannik atuisinnaanerat juulip 23-ata tungaanut atuuttussanngortinneqarpoq. Aallaqqaammut piumasaqaataagaluarpoq, tamanna juulip naanerata tungaanut atuutissasoq.
Tulluussimaartoq
Múte B. Egedep oqaatigaa, innuttaasut tuniluunerup aqunneqarsinnaanngornissaanut akisussaaffimmik tigusisimanerat oqartussallu inassuteqaataannik malinninnerat tulluussimaarutigalugu.
- Taamatut iliornikkut tuniluunneq siammatsaaliorsinnaavarput. Tamatta akisussaaffigaarput peqatigiilluta kivitsinissarput, Naalakkersuisut Siulittaasuat, killilersuutissanik aalajangiussaqarnermi Inatsisartuni partiit ilaasortaatitaaqartut tamarmik siulittaasui peqataaatinneqarsimasut erseqqissaasoq oqarpoq.
Taassuma nassuiaatigaa, kikkut tamarmik ilaaffigisinnaasaannik atuinissamut akiuussutissalertissimanissamut piumasaqaat qasukkarneqartoq, tassa coronap aqunneqarsinnaasutut isikkoqalernera pissutigalugu.
Katersuunnermi inuit 20-innaanissaannik piumasaqaat suli atuuppoq, sapaatilli akunnerata tulliani killersuutit atuuttut allanngortinneqassanersut naliliffigineqassaaq.
- Arlaannik annikitsuaqqamilluunniit pisoqassagaluarpat tuniluuttoqangaatsialersinnaavoq, Múte B. Egede tamakkiisumik akiuussutissalertissimagaanni coronapassimik pissarsiniarnissamik tamanut kaammattuisoq oqarpoq .
Misissuinerit
Kiista Fenckerip erseqqissaatigaa, isumannaatsumik iliuuseqarsinnaaneq annikillisinneqassanngitsoq.
- Qanermut assiaqutit pisuinnaat aqqutaanni aqqusinernilu takussaapput. Taakku eqqaavimmut iginneqarnissaat eqqaamaneqassaaq, Kiista Fencker kaammattuivoq.
Tusagassiortunik katersortitsinissaq sioqqutilaarluni oqartussat ilisimatinneqarsimapput, Sisimiuni tunillatsissimasoq nutaaq ataaseq paasineqarsimasoq, tunillatsissimasullu allanik tunillaasinnaanera ernumanaateqanngitsoq.
Naartusut akiuussutissalerneqarsinnaanngortut
Danmarkimi Peqqissutsimut Aqutsisoqarfiup ullaaq ilisimatitsissutigaa, naartusut milutsitsisullu maanna akiuussutissalerneqarsinnaanngortut. Kalaallit Nunaanni oqartussat aalajangersimapput, Danmarkimi Peqqissutsimut Aqutsisoqarfiup inassuteqaataanik malinnittoqassasoq, qaammatillu sisamassaani naartusunut akiuussutissalerneqarnissaq kaammattuutigalugu, Paneeraq Noahsen Nunatsinni Nakorsaaneqarfimmeersoq oqaluttuarpoq.
Piviusut:
25-t tunillatsissimasuupput
Napparsimmavimmi uninngasoqanngilaq
37.594-it misissortissimapput
Innuttaasut 34,05 procentii tamakkiisumik akiuussutissalerneqarsimapput