nunarsuarmik kaajallaasoq
Angalaneq pissanganartoq: Nuummukarnissaminut aqqut takisooq atortariaqarpaa
Nunarsuaq tamakkerlugu angalasoq Torbjørn C. Pedersen Qaqortumit Qeqertarsuup Tunuatigoorluni umiarsuarmut 'Arina Arctica'-mut ilaalluni Nuummukassaaq
Torbjørn C. Pedersen nunarsuaq kaajallallugu angalassaaq timmisartoq atornagu. Maannakkut Qaqortumiippoq, qanorlu Nuummukassanerluni paaseqqammerpaa.
Aalisariummik ilaalluni sapaatip akunnerata siuliani Islandimit Qaqortumukarpoq.
- Qeqertarsuup Tunuatigooqqaarlunga Nuummukassaanga. Umiarsuarmut RAL-ip pigisaanut 'Arina Arctica'mut ilaallunga arfininngorpat aallassaanga. Qeqertarsuup Tunuatigoorluta ullut tallimat Nuummukassaagut. Tamanna Facebookimi 1.000-it malinnaasumma pissangagisorujussuuaat, sikorsuimmi assilisassakka takunissaat pissangagaat. Allaffigineqartarpunga Kalaallit Nunaat kusagisorujussuullugu, taamatullu oqarnerat ilumoorpoq.
Sermitsiaq.AG-mi Torbjørn C. Pedersenip nunarsuarmik kaajallaanera pillugu allataqareerpoq. Nunarsuarmi nunat tamaasa angalanermi ataatsimi tikinniarpai.
Maannakkut qaammatit sisamassaa angalavoq, nunarpullu ilanngullugu nunat assigiinngitsut 40-t tikereerlugit.
- Qaqortumi tikilluaqqusaalluaqaanga. Kaffillertuneereerlungalu ujakkaareerpunga. Ammerivik, ilinniarnertuunngorniarfik, napparsimavillu pulaassamaarpakka. Aamma qaqqani aneertassaanga maaniinninni. Kalaalimineerniarfimmi aamma assiliisaqattaarnissara naatsorsuutigaara, nunarsuarmioqatitsinnullu takutissallugit, oqaluttuarpoq.
Røde Korsimi ambassadøri
Torbjørn C. Pedersenip angalanermini nunat tikitani minnerpaamik ulloq ataaseq najortassavai, Danmarkimut utersinnaanngilaq, kiisalu nunani tikitamini Røde Korsit tamarmik tikittassallugit.
Angalalluni aallannginnermini Røde Korsimit ambassadørinngortinneqarpoq, nunanilu 40-ni tikeriikkamini Røde Korsit tamarmik ornereerlugit.
- Qaqortumi Røde Kors atornikueerniarfittut ingerlanneqarpoq, tamannalu takutippaa ilumut Røde Kors inuiaqatigiinni akuusoq. Røde Korsit tikitakka tamarmik pillugit allaaserisaqartassaanga. Qilanaaraara Nuummi Røde Korsip tikinnissaa, sulerisarnersut paaserusuppara kiisalu Kalaallit Nunaanni Røde Korsit qanoq ingerlanneqarnersut paaserusullugu. Røde Korsimmi oqaluttuassartaat assigiinngittuaannarput, Torbjørn C. Pedersen oqarpoq.
Torbjørn C. Pedersen nunatsinneereeruni Canadaliassaaq, kisianni imaassinnaasoq Islandikkooqqeqqaarluni Canadamut ikaartoq.