Angajora nuannaartoreqaara
Ivaana Holm, arnani assammik arsarlutik nunanut allanut unammisartuni anføreri, angajuni assammik arsartalermat aallartippoq. Qaammatit pingasut qaangiuppata nunanut allanut unammisartoqatini peqatigalugit assammik arsarluni VM-eqarnissaani erfalasutsinnik takutitseqataassaaq
VM-imut anngunniunnerit naggataanni ajugaaniutivinnermi halvejet marluk naammata dommeri siggarmat qulliit nakkaapput nuannaarnermik tulluusimaarnermillu misigissutsit sarsuallutik. Tusagassiortoq unnuit tullleriiaat mobilini saallugu unamminerit isiginnaarsimavai. Maanna naapput. Nunanut allanut unammisartuvut VM-eriassapput ukioq manna novembarip naanerani Danmarkimi, Sverigemi Norgemilu ingerlanneqartussamut.
Anngunniunnerit Nuummi 2023-mi juunip aallartinnerani ingerlanneqarput, kalaallillu arnartaat nunanut allanut unammisartut USA, Canada, Mexico piukkunneqartorlu Cuba tamaasa ajorsartippaat isiginnaartunit illersorneqarluarlutik. Nunagisami unammineq pikkunarluinnartoq.
Ivaana Holm nunanut allanut unammisartuni anføreriuvoq, aappassaanillu VM-eriarnissani
qilanaareqalugu.
- 2010-mi peqataaqqaarpunga inuusuttuaqqani unammisartut Sydkoreami U20 VM-eqarnissaanut anngukkatta. Argentinami anngunniuttoqarmat anngutinngikkaluarput. Nr. 5-inngorunarpugut. Nr. 3-nngortut peqataarusunngillat. Aamma nr. 4-nngortut. Uagut peqataavugut – taamaatittoqarmat. Massakkut allaaneruvoq, annguppugummi, Ivaana oqarpoq.
Anngunniulluni unamminerni taamak angusarissaartiginissarsi naatsorsuutigisimavisiuk?
- Siunertarivarput. 2019-imi Mexicomiikkatta nr. 3-nngorpugut. Ajunngilaq. USA-mi
ajugaaniutivinnermut annguppugut, tamannalu siunertarisimallutigu. Ajorsarujussuarpugulli eqqarsartaatsikkut piareersimavallaarsimannginnguatsiaratta.
- Nr. 1-inngornissarput maanna siunertarisimavarput. Soorunami siunertarput angussanerlutigu nalusarparput, unammisassatta inissisimanera nalileruminaattaqigami. Assersuutigalugu Canadamit unammisartunik ukiorpassuarni takusaqarsimanngilagut. Cubameersut USA-mi aamma ilaanngillat. Isumaqarsimagaluarpugut Cubameersut unammisatsinni nukittunersaassasut, kisianni Canadameerput, Ivaana nassuiaavoq.
Ivaanap meeraalluni assammik arsartalernini, sungiusarnerup ilaquttallu
oqimaaqatigiissinniarnerat kiisalu assammik arsarluni nunarsuarmi pissartanngorniunnissamut anngunnermut nuannaarneq pillugit oqaluttuai Arnanut nutaami atuarsinnaavatit.
