Angajoqqaat: Meeqqagut pillugit iliuuseqaritsi
Ulluunerani paaqqinnittarfinni sulisussaaleqineq pillugu angajoqqaat suaartaateqalerput. Akisussaasut qanoq iliuuseqartariaqalerput, Nuummi paaqqinnittarfinni angajoqqaajusut taama isumaqarput.
Ulloriaq Uilorluunniit meeraaqqerivimmut aamma meeqqerivimmut ullaakkut tunniunniaqaraangat, ilaanni perorsaasumik ilassisussaqartanngilaq.
- Tamanna toqqissisimananngilaq. Meeqqagut meeqqerivinnut qimattarpagut suliartorlutalu, nalunngikkaluarlugu sulisut paarsisinnaasut amigaatigineqartut, Trine Chemnitz meeqqerivimmi angajoqqaaqatigiit sinnerlugit taama oqarpoq.
Trine Chemnitz ukiuni 20-ni meeqqerivinniittuuteqareersimavoq, meeraasami ukiui nikigangaatsiaramik. Ukiuni taakkunani meeqqeriviit sulisussaaleqiuarneri misilittagaqarfigilluarpaa, angajoqqaaqatinilu assigalugit maanna naammagiliilluinnarpoq.
- Nikallornarluinnarpoq. Naluarput qanoq iliorsinnaanerluta. Kommunep aamma nalulluinnarpaa qanoq iliorsinnaanerluni, iliusissaarutivippugut, oqarpoq.
Kommunep angajoqqaat ikiortiserai
Nuna tamakkerlugu perorsaasutut atorfiit 132 inuttalerneqarsimanngillat. Nunatsinni Perorsaasut Kattuffiata, NPK-p, kisitsisaata, apriilimi saqqummersut tamanna takutippaat. Illoqarfiit pingaarnersaata kommuniani perorsaasut amigaatigineqarnersaapput, tassani perorsaasut 49-t amigaatigineqaramik.
Kommunelu maanna qisuariarpoq, Nuummilu Qinngorpumi meeqqerivimmi Nukariinni angajoqqaat ataatsimeeqatigineqarnissaat piumasaralugu. Ataatsimiinnermi sulisut amigaatigineqarnerat oqaluuserineqarpoq. Angajoqqaat aaqqiissutissanik siunnersuuteqaqquneqarput. Ilaatigut meeqqerivimmi sulisunik ikiuutissasut siunnersuutigineqarluni – angajoqqaat suliffimminniit soraareernerisa kingorna.
Tamannali “paatsoornartumik oqartoqarsimaneranik“ tunngaveqartoq, kommune kingorna nassuiaateqarpoq, aammalu angajoqqaat meeqqerivinni soorunami sulisussaanngitsut naqissusiilluni.
Akerliussutsimik takutitsineq kinguneqanngitsoq
Nunatsinni perorsaasunik amigaateqartoqarnera pillugu politikerinik iliuuseqartoqaqqusilluni Nuummi akerliussutsimik septembarip pingajuani takutitsisoqarpoq. Maanna qaammatit marluk qaangiunnerini akerliussutsimik takutitsineq iluaqutaasimanngitsoq, angajoqqaaqataasup Trine Chemnitzip nassuerutigisariaqarpaa.
- Erloqinaqaaq, sukumiinerusumik qanoq iliortoqartariaqalerpoq, taanna oqarpoq.
Kommune aaqqiissutissanik nassaarsinnaanngippat – uungaannaq killittunilluunniit aaqqiipallassinnaanngippat – nunami politikeriusut qanoq iliortariaqalivissut Trine Chemnitz angajoqqaaqatinilu isumaqarput.
- Akerliussutsimik takutitsineq iluaqutaasimanngilaq. kommune isumassaarutiivilluni angajoqqaat aaqqiissutissanik siunnersuuteqaqquppagit, taava piffissanngorsimassaaq Naalakkersuisut aaqqiissusiorlutik akulerunnissaanut, Trine Chemnitz angajoqqaaqatini sinnerlugit oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...