Angajoqqaat: Kommunep ernerput sumiginnarpaa
Nukappiaraq tallimanik ukiulik ukiut pingasut ingerlaneranni perorsaasunit meeqqamut ikorfartortaasunit assigiinngitsunit qulinit isumagineqartarpoq. Taakku tamarmik ilinniagaqarsimanngillat taamalu nukappiaqqamut oqalunniarnerminik ajornartorsiuteqartumut ikorfartuisinnaanatik. Nukappiaqqap atualeqqaarsinnaanissaa maanna ilimanarunnaarpoq.
Tallimanik ukiullip Stevenip peqatini ilagalugit aasaru atualeqqaarluni nalliuttorsiorsinnaanissaa qularnartoqarpoq. Taassuma tusaaniarnerminik ajornartorsiuteqarnini, meeraaraallunili aallartittoq pissutigalugu, oqalunniarneq ajornartorsiutigaa. Aatsaat marlunnik ukioqalereersoq nakorsat paasivaat nipit imermiittutut tusaasarai. Taamaattumik siutimigut imaajarneqarpoq toqqusaamilu qinersii peersillugit, tamatumalu kingorna aatsaat oqaatsiminik ineriartortitsisinnaalerluni. Tamannali arriitsuinnarmik pivoq.
Avisii AG taama allappoq.
Meeqqat inunngoraangamik ilaatigut tusaasatik ikiorsiullugit ineriartortarput. Erninnut atatillugu aamma taamaappoq. Aatsaalli tamanna pilluni siutimigut imaarsarneqareermat, tassa marlunnik ukioqalereersoq, Stevenip arnaa, Tanja Kristiansen oqarpoq.
Utaqqineq sivisooq
Ilaqutariit kommunimi sullissisuminnut nikerartunut, MISI-mut (meeqqanut inuusuttunullu siunnersuisarfimmut, aaqq.) Dronning Ingridip Peqqissaavianut aamma meeqqerivimmut saaffiginnittarnitik pissarsiaqarfigineq ajorpaat. Tanjap qanoq iliussanerluni maanna nalulerpaa.
Nunatsinni pingasuinnarnik oqallorissaasoqarpoq MISI-milu sukumiisumik misissuisoqassatillugu qaammatit arfinillit missaanni utaqqisoqartarluni.
Anaanaasup oqaluttuarnera aamma kommunep MISI-llu qisuariarnerat aviisimi AG-mi atuarsinnaavatit – aviisi uani ataani pissarsiarisinnaavat: