Angajoqqaat kigutit nakorsaannik angalasartoqarnissaannik kissaateqartut

Sooq meeqqat narlorinngitsunik kiguteqarlutik inunngorsimasut narlorissartinnermut akiliuteqartassappat, Kalaallit Nunaanni Peqqinnissaqarfimmi peqqinnissatigut neqeroorutit allat akeqartinneqanngitsut? Angajoqqaat Sisimiuneersut kigutit nakorsaannik angalasartoqalernissaanik kissaateqartut aperipput.

Sooq illoqarfiit pingaarnersaanni najugaqanngikkutta, kigutit narlorissartinneqarnissaannut atatillugu meerara ajornerusumik inissisimatinneqassava?

Kigutilerisut kigutit narlorsartinneqarnissaat siunertaralugu Nuummi kigutit nakorsaannut namminersortumut innersuussisarnerat eqqarsaatigalugu angajoqqaarpassuit taamatut aperisarput.

Sakarine O. Müllerip ajornartorsiut tamanna nammineerluni misigisimavaa.

- Meeqqama kigutai narlorissuunngimmata, kigutigissaasup narlorissaatilerneqarnissaa innersuussimavaa. Ilisimatinneqarpugut Sisimiuni taamatut neqerooruteqartoqarneq ajormat, Nuummi kigutilerifimmut namminersortumut narlorissartikkiartorlugit angalanitsinnut, akunnittarnitsinnut, nerisaqarnitsinnut, najugaqarnitsinnut kigutaasalu narlorissartinneqarnerannut aningaasartuutissat nammineq akilissagivut, Sakarine O. Müller Sermitsiaq.AG-mut oqaluttuarpoq.

Amerlasuut assingusumik ajornartorsiuteqartut

Taassuma ilisimatitsissutigaa, Sisimiuni angajoqqaaqatigiit illoqarfimmi kigutinik narlorissaasoqartannginnera pillugu oqaloqatigiinnerannut ilaasimalluni. Sisimiut ulloq 1. juli 2021 5.653-inik inoqarpoq, Kalaallillu Nunaanni illoqarfiit annersaannut tulliulluni.

Sakarine O. Müllerip Naalakkersuisut Nunatta Karsiata imaanik misissuereerlutik nalunaarutigimmassuk, 2020-mi kigutit narlorissarneqarnissaannut aningaasaliissutit atorneqarsimanngitsut kamaatigisimavaa.

Suliammi ingerlanneqarnerani politikkerinit oqaatigineqarsimammat, Nuup avataani kigutinik narlorissaanissamut aningaasassaqartitsisoqanngitsoq.

- Sooq aningaasat allatut atorneqarsimanngillat, Nuummi meeqqat akeqanngitsumik neqeroorfigineqarsinnaappata, meeqqat allat kigutaannik narlorissaanissamik neqeroorfigineqarsinnaaqqullugit, Sakarine O. Müller aperivoq.

- Kissaatiginarpoq angalasartunik pilersitsisoqarnissaa, sineriammi meeqqat kigutaannik narlorissaanermik suliaqartartussanik, meeqqat tamarmik taamaalillutik naapertuilluartumik isumagineqartalissagaluarput, taanna Sermitsiaq.AG-mut oqarpoq.

Neqeroorutit allat akeqanngitsut

Kigutit narlorissarneqarnissaannik neqeroorut 2021-p aallartinneranili atuutsinneqalersoq Nuummi taamaallaat atuutsinneqarpoq. Taamanikkut Naalakkersuisuusut erseqqissaassutigaat, meeraq kigutit nakorsaannut kigutinik narlorissaanermik immikkut ilisimasalimmut innersuunneqartinnagu, innersuussinermi piumasaqaatit ilaat naammassineqaqqaarsimasariaqartut.

Tassungali atatillugu kigutit nakorsaannik kigutinik narlorissaanermik immikkut ilisimasalinnik atorfinitsitsisoqartariaqarpoq.

Sakarine Müllerip angajoqqaaqataasalu oqaatigaat, Peqqinnissaqarfimmi peqqinnissatigut neqeroorutit alla akeqanngitsumik isumagineqarsinnaatillugit, kigutit narlorissarneqarnissaannik neqeroorut illoqarfinni allani akeqartinneqarneratigut inuiaqatigiinni assigiinngisitsilluni ingerlatsisoqartoq.

Taassuma ilanngullugu oqaatigaa, uummatit nakorsaat aamma siutinut, qinnganut toqqusaanullu nakorsat sineriammi angalallutik inuunermut ulorianartorsiortitsinngikkaluartunik suliaqartartut.

- Inuppassuit Nuummi misissortinnissamut neqeroorfigineqartarput, tassani angalaneq, najugaqarneq misissortinnerlu akeqartaratik. Sooq kigutit narlorissuunnginnerat meeqqat pisuussutiginngikkaat, meeqqat kigutaannut tamanna atuutsinneqanngila, Sakarine O. Müller oqarpoq, nangillunilu:

- Sooq neqeroorut meeqqanut narlorinngitsunik kigutilinnut atuutsinneqanngilaq? Sooq kigutit nakorsaattut immikkut ilinniagalik angalatinneqartanngila meeqqavullu najukkatsinni suliaralugit?

Taassuma kigutit nakorsaat kigutinik narlorissaanermik immikkut ilisimasallit kigutinik narlorissaajartortillugit Kalaallit nunaanni angalatinneqartalernissaat ujartorpaa.

Powered by Labrador CMS