Skip to main content

Angajoqqaat: Atuarfik Mathias Storch matuniarli

Ilulissani atuarfiup aappaa Mathias Storch oqoqarpoq. Angajoqqaat maanna piumasaraat ukiup atuarfiup nutaap aallartinnginnerani atuarfik matuneqassasoq

Ilulissani Atuarfik Mathias Storchimi atuartut angerlartarput niaqorlullutik inuunilullutillu. Ilaat aamma anersaartorniarnermikkut ajoquteqalersimapput. Angajoqqaat aarleqqutigaat tamatuma oqummik pissuteqarsimasinnaanera. Maanna atuarfiup matuneqarnissaa piumasaraat.

- Qitornarput angerlartarpoq niaqorlulluni inuunilullunilu. Taamatuttaaq aamma nuliara ilinniartitsisuusoq soraaraangami misigisarpoq. Ilaatigut sineqqaarlutik iluaallattarput, Atuarfik Mathias Storchimi 4. klassemiittumik atuartuutilik Jørgen Lundblad Sermitsiaq.AG-mut oqaluttuarpoq.

Atuarnerat unitsinniarpaat

Oqoqarnera pillugu angajoqqaat ernumaammersimaartut ataatsimeeqatigiittarput. Taakku aamma aaqqissuuppaat maajip qulingani akerliussutsimik takutitsineq tassanilu kommunimit ilisimatinneqarput aaqqiissutissamik ujarlertoqartoq. Ukioq atuarfiusoq maanna naaqqajaalermat angajoqqaat piumasaraat ukiumut atuarfiusumut aallartittussamut aaqqissutissamik maanna nassaartoqassasoq.

Napparsimasarnermut ersiutaasut arlallit angajoqqaanik ernumalersitsipput.

- Amerlasuut sapingaqarnermik nappaateqalereernikuupput, anersaartorniarnermikkut amimikkullu ajornartorsiuteqalereerlutik, angajoqqaat ataatsimoorlutik nalunaarput.

Taakku siunnersuutigaat atuartitsinerup illoqarfimmi ininut allanut nuunneqarnissaa. Siunnersuutigineqarput paaqqinnittarfiit kulturillu illorsuaq Sermermiut ullaap tungaani atorneqanngiffianni atuartitsiffigineqarsinnaasut. Siunnersuutit ilagaat atuarfiup aappaani Atuarfik Jørgen Brønlundimi unnulaami atuartitsisoqartarsinnaanera.

- Tamakku eqqarsaasersuutigut piviusorsiornersut pisortat, atuarfiup pisortaanit ilinniartitsisullu peqatigiillusi nalilersorsigit. Atuarfiusoq tulleq 2013/14 aallartiffigalugu aaqqiisoqarli! Atuarfimmut peqqiilliorfimmut meerartagut ornigutseqqinnianngilagut!, angajoqqaat ernumaammersimaartut allapput.

Pilersaarummik tigussaasumik maanna saqqummiussisoqarnissaa piumasaraat. Tallimanngorneq juunip 14-iat ullup qeqqa qitornatik aaniarpaat ukiullu atuarfiusup sinnera atuariartorteqqinnagit aaqqiissutissamik nassaartoqanngippat.

Sermitsiaq.AG-miit Qaatsuitsup Kommunianiit oqaaseqartitsiniaraluatta iluatsinngilarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER