Angajoqqaaq atuartuutilik: Ernera ineriartorluarpoq
Manumina Jensen Atuarfik Samuel Kleinschmidtimi atuartumik erneqarpoq, taanna atuarnerminut ajornartorsiuteqartarpoq. Coronartoqarnerani atuanngiffeqareernermiilli uterami allanngortoqarpoq, tassami ernerata atuarfik nuannarilerpaa
Kalaallit Nunaanni coronartoqarnerata pissutigisaanik meeqqat angerlarsimaffimmi atuartinneqareersut atuarfimmi atualeqqimmata allanngortoqarpoq.
Manumina Jensen erneqarpoq Atuarfik Samuel Kleinschmidtimi 4. klassimi atuartumik, Stian Jensenimik ateqarluni.
- Siornatigut eqqissiviittarnikuuvoq kamaqqajaasinnaasarluni, aamma atuarfimmit sianerfigitikulasarnikuuvugut arlaannik ajornartorsiuteqartoqarnera pissutaalluni. Aamma ilaatigooriarluni napparsimasuusaartarnikuuvoq atuariartorusunnginnini pissutigalugu, Manumina Jensen Sermitsiaq.AG-mut oqaluttuarpoq.
Tunniusimanerulersoq
Atuarfiilli matuneqariasaarput coronap pissutigisaanik, tamannalu pereermat atuarfiit ammaqqimmata allanngortoqartoq, anaanaasup oqaatigaa.
- Ineriartortorujussuanngornikuuvoq atuaqatigiit qulit missaanniileramik. Stianni angerlaraangami oqaluttuassaqartuaannalerpoq, tamanna siornatigut takusimanngisaannarparput. Atuarfimmut maannakkut tunniusimanerujussuanngornera malugeqaarput, oqarpoq.
- Assersuutigalugu Danmarkip aniguisinneqarnera pillugu oqaluttualeriasaarpoq sapaatip akunnera kingulleq. Sammineqartoq paasisimalluarpasippaa, innuttaasut akornanni ilaatigut taamani susoqarsimanersoq oqaluttuarilerlugu, aamma sammisartik pillugu suli paasisaqaqqinnerorusulerluni. Siornatigut taamatut soqutiginnitsigisoq takunikuunngilara, Manumina Jensen oqarpoq.
Nukissaqarnerulertoq
Ernerata tunniusimanerulernera ilikkarusussuseqarnerulerneralu anaanaasup nuannaarutigaa.
- Taamaattoq takullugu tuppallernaqaaq, siornatigummi isumaliutigisarnikuuarput qanoq ililluta atuarfik soqutiginarsassanerlugu, maannakkullu suna amigaataasimanersoq paasisinnaalerparput. Nalunngikkaluarpara atuaqatigiiaat ilaat 20-it sinnerlugit atuartoqaraluartut aamma ilikkagaqarluartartatut, kisianni takusinnaalerparput klassimi atuartut ikinnerunerat Stianip iluaqutigineruaa, Manumina Jensen oqarpoq.