Angajoqqaaq aalajangiisoqarnissaanut ukiuni sisamani utaqqisimasoq

Kommunit pingasut ukiut sisamat sinnerlugit akuersinermut tunuartitsineq pillugu suliaq suliarisimavaat, taamaalilluni angajoqqaap meeqqani angerlarteqqissinnaaniassammagu. Piffissaq suliamik suliarinninnernermut atorneqartoq sivisooq isorisarialik, ombudmandi taama oqarpoq.

Meeqqap 13-inik ukiullip angerlarsimaffiup avataanut inissinneqarnissaanut, 2011-p naanerani angajoqqaaq akuersivoq.

Ukiup affaa qaangiuttoq maajimi 2012-imi angajoqqaatut oqartussaassuseqartup akuersissutini tunuartinniarlugu meeraq angerlarteqqinneqassasoq kommuni piumaffigaa.

Ukiut sisamat qaangiuttut meeqqap 18-inik ukioqalernissaa qaammatinik marlunnik sioqqullugu, taamaalillunilu sumi najugaqarnissaminut aalajangersinnaalertussanngortoq, suliami aalajangiisoqarpoq.

Kommunit pingasut ilaasut

Suliap ingerlanerani angajoqqaatut oqartussaassuseqartoq kommuninut allanut marlunnut nuuppoq.

Ombudsmandip suliaq suliarisimavaa, sullissinermilu piffissaq atorneqartoq pillugu kommuninut pingasunut tamanut suliamik ingerlatsisimasumut isornartorsiuivoq.

Annertoorujussuarmik akuliuffigineqartoq

- Angajoqqaatut oqartussaassusermik tigummiaqartoq akuersitinnagu angerlarsimaffiup avataanut inissiinerup annertoorujussuarmik akuliuffiunera Ombudsmandip pingaartillugu aamma isiginiarpaa, ombudmandi suliap eqikkarneranik tusagassiorfinnut nassiussaqartoq taama isornartorsiuivoq.

Ombudsmandip Vera Lethip tamatumunnga atatillugu oqaatigaa kommunip siulliup suliamik uppernarsaasersuinerata amigaateqarnera kommunit kingulliit marluk suliap ingerlasimaneranik paasisaqarnissaminnut periarfissaannut taamalu aamma piffissamut kommunit taakku suliamik suliarinninnerminnut atugaannut sunniuteqarsimasoq ilisimasariaqartoq.

Kommunip siulliup suliamik uppernarsaasersuinerup amigaateqarnera ombudsmandimut ajuusaarutigaa, suliniutillu arlallit siunissaq isigalugu sulianik suliarinninnermi amigaatinik taamaattumik pinaveersimatitsisussat pillugit nassuiaateqartoq, Vera Leth ilisimatitsivoq.

Inatsiseqartitsinikkut innarlitsaalineqarnera sanngiillisinneqarsimasoq

Kiisalu ombudsmandip tikkuarlugu oqaatigaa angajoqqaatut oqartussaassusermik tigummiaqartoq suliap ukiuni sisamani ingerlanerani naammagittaalliorsinnaasimanngitsoq oqaatigaa.

Kommunit pingajuata suliaq naammassimmagu aalajangerneqarpoq, meeraq angerlartinneqarsinnaanngitsoq, akuersissuteqanngitsumillku angerlarsimaffiup avataanut inissinneqassasoq.

Powered by Labrador CMS